Tato paṭṭhāya bodhisatto uyyāne vasati. Rājāpissa divase divase dvittikkhattuṃ upaṭṭhānaṃ gacchati. Tassa pana rañño duṭṭhakumāro nāma putto ahosi caṇḍo pharuso. Neva naṃ rājā dametuṃ sakkhi na sesañātakā. Amaccāpi brāhmaṇagahapatikāpi ekato hutvā sāmi mā evaṃ kari evaṃ kātuṃ na labbhāti kujjhitvā kathentāpi kathaṃ gāhāpetuṃ na sakkhiṃsu. Rājā cintesi ṭhapetvā mama ayyaṃ sīlavantaṃ tāpasaṃ añño imaṃ kumāraṃ dametuṃ samattho nāma natthi soyeva naṃ damessatīti. So kumāraṃ ādāya bodhisattassa santikaṃ gantvā bhante ayaṃ kumāro caṇḍo pharuso mayaṃ etaṃ dametuṃ na sakkoma tumhe naṃ ekena upāyena sikkhāpethāti kumāraṃ bodhisattassa niyyādetvā pakkāmi. Bodhisatto kumāraṃ gahetvā uyyāne vicaranto ekato ekena ekato ekenāti dvīhiyeva pattehi ekaṃ nimbapotakaṃ disvā kumāraṃ āha kumāra Etassa nimbarukkhapotakassa paṇṇaṃ khāditvā rasaṃ jānāhīti. So etassa ekaṃ paṇṇaṃ khāditvā rasaṃ ñatvā chichīti saha kheḷena bhūmiyaṃ nuṭṭhubhi kiṃ etaṃ kumārāti vutte bhante idānevesa rukkho halāhalavisūpamo vaḍḍhanto pana bahū manusse māressatīti taṃ nimbapotakaṃ uppāṭetvā hatthehi parimadditvā imaṃ gāthamāha

ekapaṇṇo ayaṃ rukkho na bhūmiyā caturaṅgulo

phalena visakappena mahāyaṃ kiṃ bhavissatīti.

Tattha ekapaṇṇoti ubhosu passesu ekekaṃ paṇṇaṃ. Na bhūmiyā caturaṅguloti bhūmito caturaṅgulamattampi na vaḍḍhito. Phalenāti phalarasena. Visakappenāti halāhalavisasadisena. Evaṃ khuddakopi samāno evarūpena tittakapaṇṇena samannāgatoti attho. Mahāyaṃ kiṃ bhavissatīti yadā ca panāyaṃ vuḍḍhippatto mahā bhavissati tadā kiṃ bhavissati addhā manussamāraṇako bhavissatīti etaṃ uppāṭetvā madditvā chaḍḍesinti āha.