ramaṇīyā vata bho dosinā ratti kaṃ nu kho ajja mayaṃ samaṇaṃ vā brāhmaṇaṃ vā payirūpāseyyāma yanno payirūpāsataṃ cittaṃ pasīdeyyāti. Atheko amacco puraṇakassapassa vaṇṇaṃ kathesi eko makkhaligosālassa eko ajitakesakambalassa eko pakudhakaccāyanassa eko sañjayaveḷaṭṭhaputtassa eko nāṭaputtaniggaṇṭhassāti. Rājā tesaṃ kathaṃ sutvā tuṇhī ahosi. So hi jīvakasseva mahāmaccassa kathaṃ paccāsiṃsati. Jīvakopi raññā maṃ ārabbha kathiteyeva jānissāmīti avidūre tuṇhī nisīdi. Atha naṃ rājā āha tvaṃ pana samma jīvaka kiṃ tuṇhīti. Tasmiṃ khaṇe jīvako uṭṭhāyāsanā yena bhagavā tenañjalimpaṇāmetvā eso deva bhagavā arahaṃ sammāsambuddho amhākaṃ ambavane viharati saddhiṃ aḍḍhaterasehi bhikkhusatehi tañca pana bhagavantaṃ evaṃ kalyāṇo kittisaddo abbhuggatoti navasatāni pāṭihāriyāni jātito paṭṭhāya pubbanimittādibhedaṃ bhagavato ānubhāvaṃ pakāsetvā taṃ bhagavantaṃ devo payirūpāsatu dhammaṃ suṇātu pañhaṃ pucchatūti āha. Rājā sampuṇṇamanoratho hutvā tenahi samma jīvaka hatthiyānāni kappāpehīti yānāni kappāpetvā mahantena rājānubhāvena Jīvakambavanaṃ gantvā tattha maṇḍalamāle bhikkhusaṅghaparivutaṃ tathāgataṃ disvā santavīcimajjhe mahānāvaṃ viya niccalaṃ bhikkhusaṅghaṃ ito cito ca anuviloketvā evarūpā nāma me parisā na diṭṭhapubbāti iriyāpatheyeva pasīditvā saṅghassa añjaliṃ paggaṇhitvā thutiṃ vatvā bhagavantaṃ vanditvā ekamantaṃ nisinno sāmaññaphalapañhaṃ pucchi. Athassa bhagavā dvīhi bhāṇavārehi paṭimaṇḍitaṃ sāmaññaphalasuttantaṃ kathesi. So suttapariyosāne attamano bhagavantaṃ khamāpetvā uṭṭhāyāsanā padakkhiṇaṃ katvā pakkāmi.
Satthā acirapakkantassa rañño bhikkhū āmantetvā khatāyaṃ bhikkhave rājā upahatāyaṃ bhikkhave rājā sacāyaṃ bhikkhave rājā issariyassa kāraṇā pitaraṃ dhammikaṃ dhammarājānaṃ jīvitā na voropessati imasmiṃyeva āsane virajaṃ vītamalaṃ dhammacakkhuṃ uppajjissati devadattampana nissāya asantaṃ sampaggahaṃ katvā sotāpattiphalā parihīnoti āha. Punadivase bhikkhū dhammasabhāyaṃ kathaṃ samuṭṭhāpesuṃ āvuso ajātasattu kira asantaṃ sampaggahaṃ katvā dussīlaṃ pāpadhammaṃ devadattaṃ nissāya pitughātakammassa katattā sotāpattiphalā parihīno devadattena nāsito rājāti. Satthā āgantvā kāya nuttha bhikkhave etarahi kathāya sannisinnāti pucchitvā imāya nāmāti vutte na bhikkhave ajātasattu idāneva asantaṃ sampaggahaṃ katvā mahāvināsaṃ patto pubbepesa asantaṃ sampaggaheneva attānaṃ nāsesīti vatvā atītaṃ āhari.