Atīte bārāṇasiyaṃ brahmadatte rajjaṃ kārente bodhisatto mahāvibhave brāhmaṇakule nibbattitvā vayappatto takkasilaṃ gantvā sabbasippāni uggaṇhitvā bārāṇasiyaṃ disāpāmokkho ācariyo hutvā pañcamāṇavakasatānaṃ sippaṃ vācesi. Tesu māṇavesu eko sañjīvo nāma māṇavo atthi. Bodhisatto tassa matakuṭṭhāpanamantaṃ adāsi. So uṭṭhāpanamantameva gahetvā paṭibāhanamantaṃ agahetvā ekadivasaṃ māṇavehi saddhiṃ dāruatthāya araññaṃ gantvā ekaṃ matabyagghaṃ disvā māṇave āha bho imaṃ matabyagghaṃ uṭṭhāpessāmīti. Māṇavā na sakkhissasīti āhaṃsu. Passantānañyeva vo uṭṭhāpessāmīti. Sace sakkosi uṭṭhāpehīti evañca pana vatvā te māṇavā rukkhaṃ abhiruhiṃsu. Sañjīvo mantaṃ parivattetvā matabyagghaṃ sakkharāya paharati. Byaggho uṭṭhāya vegena gantvā sañjīvaṃ galanāliyaṃ ḍaṃsitvā jīvitakkhayaṃ pāpetvā tattheva pati. Ubho ekaṭṭhāneyeva matā nipajjiṃsu. Māṇavā dārūni ādāya gantvā taṃ pavuttiṃ ācariyassa ārocesuṃ. Ācariyo māṇave āmantetvā tātā asantaṃ sampaggahakā nāma ayuttaṭṭhāne sakkārasammānaṃ karontā evarūpaṃ dukkhaṃ paṭilabhantiyevāti vatvā imaṃ gāthamāha

asantaṃ yo paggaṇhāti asantaṃ cūpasevati

tameva ghāsaṃ kurute byaggho sañjīviko yathāti.

Tattha asantanti tīhi duccaritehi samannāgataṃ dussīlaṃ Pāpadhammaṃ. Yo paggaṇhātīti yaṃ khattiyādīsu yokoci evarūpaṃ dussīlaṃ pabbajitaṃ vā cīvarādisampadānena gahaṭṭhaṃ vā uparajjasenāpatiṭṭhānādi- sampadānena paggaṇhāti sakkārasammānaṃ karotīti attho. Asantaṃ cūpasevatīti yo ca evarūpaṃ asantaṃ dussīlaṃ upasevati bhajati payirūpāsati. Tameva ghāsaṃ kuruteti tameva asantaṃ sampaggaṇhakaṃ so dussīlo pāpapuggalo ghasati khādati vināsaṃ pāpeti. Kathaṃ. Byaggho sañjīviko yathāti yathā sañjīvena māṇavena mantaṃ parivattetvā matabyaggho sañjīviko jīvitasampadānena sampaggahito attano jīvitadāyakaṃ sañjīvameva jīvitā voropetvā tattheva pātesi evaṃ aññopi yo asantaṃ sampaggahaṃ karoti so dussīlo taṃ attano sampaggahakameva vināseti evaṃ asantaṃ sampaggahakā vināsaṃ pāpuṇantīti.