Sīho tassa vacanaṃ sutvā samma sūkara ajja amhākaṃ tayā saddhiṃ saṅgāmo natthi, ito pana sattame divase imasmiṃ yeva ṭhāne saṅgāmo hotūti vatvā pakkāmi. Sūkaro sīhena saddhiṃ Saṅgāmessāmīti tuṭṭhapahaṭṭho taṃ pavuttiṃ ñātakānaṃ ārocesi. Te tassa kathaṃ sutvā bhītabhītā idāni tvaṃ sabbepi amhe nāsessasi, attano balaṃ ajānitvā sīhena saddhiṃ saṅgāmitukāmosi, sīho āgantvā sabbepi amhe jīvitakkhayaṃ pāpessati, sāhasikaṃ kammaṃ mā karīti āhaṃsu. So bhītatasito idāni kiṃ karomīti pucchi. Sūkarā samma tvaṃ etesaṃ tāpasānaṃ uccārabhūmiyaṃ gantvā pūtigūthe sattadivasāni sarīraṃ vattetvā sarīraṃ sukkhāpetvā sattame divase sarīraṃ ussāvabindūhi temetvā sīhassa āgamanato purimataraṃ āgantvā vātayogaṃ ñatvā uparivāte tiṭṭha, sucijātiko sīho tava sarīragandhaṃ ghāyitvā tuyhaṃ jayaṃ datvā gamissatīti āhaṃsu. So tathā katvā sattame divase tattha aṭṭhāsi. Sīho tassa sarīragandhaṃ ghāyitvā gūthamakkhitabhāvaṃ ñatvā samma sūkara sundaro te leso cintito, sace tvaṃ gūthamakkhito nābhavissa, idheva taṃ jīvitakkhayaṃ pāpessaṃ, idāni pana te sarīraṃ neva mukhena ḍaṃsituṃ na pādena paharituṃ sakkomi, jayaṃ te dammīti vatvā dutiyaṃ gāthamāha

asuci pūtilomosi, duggandho vāyasi sūkara,

sace yujjhitakāmosi, jayaṃ samma dadāmi teti.

Tattha pūtilomosīti maḷhamakkhitattā duggandhalomo. Duggandho vāyasīti atijegucchapatikkūlagandho hutvā vāyasi. Jayaṃ samma dadāmi teti tuyhaṃ jayaṃ demi.