sameti pāpaṃ pāpena sameti asatāsatanti 1-.

Tattha nayidaṃ visamasīlena soṇena suhanū sahāti yaṃ idaṃ suhanukūṭasso soṇena saddhiṃ samaṃ karoti, idaṃ na attano visamasīlena. Atha kho attano samasīleneva saddhiṃ karoti, ubhopi hete attano anācāratāya dussīlatāya samasīlā samadhātukā. Suhanupi tādisoyevāti yādiso hi soṇo suhanupi tādiso yeva. Yo soṇassa sagocaroti soṇo yaṃgocaro so taṃgocaro yeva. Yatheva hi soṇo assagocaro asse ḍaṃsento carati tathā suhanupi. Iminā nesaṃ samānagocarataṃ dasseti. Te pana anācāragocare

Ekato katvā dassetuṃ pakkhandināti ādi vuttaṃ. Tattha pakkhandināti assānaṃ upari pakkhandanasīlena pakkhandanagocarena. Pagabbhenāti kāyapāgabbhiyādisamannāgatena dussīlena. Niccaṃ sandānakhādināti attano bandhanayottaṃ khādanasīlena khādanagocarena ca. Sameti pāpaṃ pāpenāti etesu aññatarena saddhiṃ aññatarassa pāpaṃ dussīlyaṃ sameti. Asatāsatanti etesu aññatarena asatā anācāragocarasampannena saha itarassa asatassa asādhukammaṃ sameti gūthādīni viya gūthādīhi ekato saṃsandati sadisaṃ nibbisesameva hotīti.

Evaṃ vatvā pana bodhisatto mahārāja raññā nāma na atiluddhena bhavitabbaṃ, parassa santakaṃ nāma nāsetuṃ na vaṭṭatīti rājānaṃ ovaditvā asse agghāpetvā bhūtamūlaṃ dāpesi. Assavāṇijā yathāsabhāvameva mūlaṃ labhitvā haṭṭhatuṭṭhā agamaṃsu. Rājāpi bodhisattassa ovāde ṭhatvā yathākammaṃ gato.