Atheko bārāṇasiyā avidūre nesādagāmavāsī nesādo himavantappadese vicaranto tasmiṃ daṇḍakahiraññapabbatamatthake nisinnaṃ bodhisattaṃ disvā āgantvā puttassa ārocesi. Athekadivasaṃ khemā nāma bārāṇasīrañño devī supinena suvaṇṇavaṇṇaṃ moraṃ dhammaṃ desentaṃ disvā pabujjhitakāle rañño ārocesi ahaṃ deva suvaṇṇavaṇṇassa morassa dhammaṃ sotukāmāti. Rājā amacce pucchi. Amaccā brāhmaṇā jānissantīti āhaṃsu. Brāhmaṇā Sutvā suvaṇṇavaṇṇā morā hontīti vatvā kattha hontīti vutte nesādā jānissantīti āhaṃsu. Rājā nesāde sannipātāpetvā pucchi. Atha so nesādaputto āma mahārāja daṇḍakahiraññapabbato nāma atthi, tattha suvaṇṇavaṇṇo, moro vasatīti. Tena hi taṃ moraṃ amāretvā bandhitvā va ānehīti. Nesādo gantvā tassa gocarabhūmiyaṃ pāsaṃ oḍḍesi. Morena akkantaṭṭhānepi pāso na sañcarati. Nesādo taṃ gaṇhituṃ asakkonto satta vassāni vicaritvā tattheva kālamakāsi. Devīpi khemā patthanaṃ alabhamānā kālamakāsi. Rājā moraṃ nissāya devī kālamakāsīti kujjhitvā himavantappadese daṇḍakahiraññapabbato nāma atthi, tattha suvaṇṇavaṇṇo moro vasati, ye tassa maṃsaṃ khādanti te ajarā amarā dīghāyukā hontīti suvaṇṇapaṭṭe akkharaṃ likhāpetvā suvaṇṇapaṭṭaṃ suvaṇṇamañjusāya nikkhipāpesi. Tasmiṃ kālakate añño rājā rajjaṃ patvā suvaṇṇapaṭaṭaṃ vācetvā ajaro amaro bhavissāmīti aññaṃ nesādaṃ pesesi. Sopi tattha gantvā bodhisattaṃ gahetuṃ asakkonto tattheva kālamakāsi. Eteneva niyāmena cha rājaparivattā gatā. Atha sattamo rājā rajjaṃ patvā ekaṃ nesādaṃ pahiṇi. So gantvā bodhisattena akkantaṭṭhānepi pāsassa asañcaraṇabhāvaṃ attano parittaṃ katvā gocarabhūmigamanabhāvañcassa ñatvā paccantaṃ otaritvā ekaṃ moriṃ gahetvā yathā hatthatālasaddena naccati accharasaddena ca vassati, evaṃ susikkhitaṃ sikkhāpetvā Taṃ ādāya gantvā morena paritte akate pāto yeva pāsayaṭṭhiyo ropetvā pāsaṃ oḍḍetvā moriṃ vassāpesi. Moro visabhāgamātugāmasaddaṃ sutvā kilesāturo hutvā parittaṃ kātuṃ asakkuṇitvā vegena gantvā pāse bajjhi. Atha naṃ nesādo gahetvā gantvā bārāṇasīrañño adāsi. Rājā tassa rūpasampattiṃ disvā tuṭṭhamānaso āsanaṃ dāpesi. Bodhisatto paññattāsane nisīditvā mahārāja kasmā maṃ gaṇhāpesīti pucchi. Ye kira tava maṃsaṃ khādanti te ajarā amarā honti, tasmāhaṃ tava maṃsaṃ khāditvā ajaro amaro hotukāmo taṃ gāhāpesinti. Mahārāja mama tāva maṃsaṃ khādantā ajarāmarā honti, ahaṃ pana marissāmīti. Āma marissasīti. Mahārāja mayi marante mama maṃsameva khāditvā kinti katvā na marissantīti. Tvaṃ suvaṇṇavaṇṇo tasmā kira tava maṃsāni khāditvā ajarāmarā bhavissantīti. Mahārāja ahaṃ na akāraṇā suvaṇṇavaṇṇo jāto, pubbe panāhaṃ imasmiṃ yeva nagare cakkavattirājā hutvā sayampi pañcasīlāni rakkhiṃ, sakalacakkavāḷavāsinopi rakkhāpesiṃ, svāhaṃ kālaṃ katvā tāvatiṃsabhavane nibbatto, tattha yāvatāyukaṃ ṭhatvā tato cuto aññassekassa akusalassa nissandena morayoniyaṃ nibbattitvā porāṇakapañcasīlānubhāvena suvaṇṇavaṇṇo `jātoti. Tvaṃ cakkavattirājā hutvā sīlaṃ rakkhitvā sīlaphalena suvaṇṇavaṇṇo jātoti kathesi kathamidaṃ amhehi saddhātabbaṃ, atthi koci sakkhīti. Atthi mahārājāti. Ko nāmāti. Mahārāja ahaṃ cakkavattikāle sattaratanamaye rathe nisīditvā ākāse vicariṃ, so me ratho maṅgalapokkharaṇiyā antobhūmiyaṃ nidahāpito, taṃ maṅgalapokkharaṇito ukkhipāpehi, so me sakkhī bhavissatīti. Rājā sādhūti paṭisuṇitvā pokkharaṇito udakaṃ nīharāpetvā rathaṃ nīharāpetvā bodhisattassa vacanaṃ saddahi. Bodhisatto mahārāja ṭhapetvā amatamahānibbānaṃ avasesā sabbe saṅkhatadhammā hutvā abhāvato aniccā khayavayadhammā yevāti rañño dhammaṃ desetvā rājānaṃ pañcasu sīlesu patiṭṭhāpesi. Rājāpi pasanno bodhisattaṃ rajjena pūjetvā mahantaṃ sakkāraṃ akāsi. So rajjaṃ tasseva paṭidatvā katipāhaṃ vasitvā appamatto hohi mahārājāti ovaditvā ākāse uppatitvā daṇḍakahiraññapabbatameva agamāsi. Rājāpi bodhisattassa ovāde ṭhito dānādīni puññāni katvā yathākammaṃ gato.