Atīte bārāṇasiyaṃ brahmadatte rajjaṃ kārente bodhisatto gijjhapabbate gijjhayoniyaṃ nibbattitvā mātāpitaro poseti. Athekasmiṃ kāle mahatī vātavuṭṭhi ahosi. Gijjhā vātavuṭṭhiṃ sahituṃ asakkontā sītabhayena bārāṇasiṃ gantvā pākārasamīpe parikhāsamīpe ca sītena kampamānā nisīdiṃsu. Tadā bārāṇasīseṭṭhī nagarā nikkhamitvā nhāyituṃ gacchanto te gijjhe kilamamante disvā ekasmiṃ anovassakaṭṭhāne sannipātetvā aggiṃ kārāpetvā gosusānaṃ pesetvā gomaṃsaṃ āharāpetvā tesaṃ dāpetvā ārakkhaṃ ṭhapesi. Gijjhā vūpasantāya vātavuṭṭhiyā kallasarīrā hutvā pabbatameva agamaṃsu. Tattheva sannipatitvā evaṃ mantayiṃsu bārāṇasīseṭṭhinā amhākaṃ Upakāro kato, katupakārassa nāma paccupakāraṃ kātuṃ vaṭṭatīti, tasmā ito paṭṭhāya tumhesu yo yaṃ vatthaṃ vā ābharaṇaṃ vā labhati tena taṃ bārāṇasīseṭṭhissa gehe ākāsaṅgaṇe pātetabbanti. Tato paṭṭhāya gijjhā manussānaṃ vatthābharaṇāni ātape sukkhāpentānaṃ pamādaṃ oloketvā senā viya maṃsapesiṃ sahasā gahetvā bārāṇasīseṭṭhissa gehe ākāsaṅgaṇe pātenti. So gijjhānaṃ ābharaṇabhāvaṃ ñatvā sabbāni tāni visuṃ yeva ṭhapāpesi. Gijjhā nagaraṃ vilumpantīti rañño ārocesuṃ. Rājā ekaṃ gijjhampi tāva gaṇhatha, sabbaṃ āharāpessāmīti tattha tattha pāse ceva jālāni ca oḍḍāpesi. Mātuposakagijjho pāse bajjhi. Taṃ gahetvā rañño dassessāmāti nenti. Bārāṇasīseṭṭhī rājupaṭṭhānaṃ gacchanto te manusse gijjhaṃ gahetvā gacchante disvā mā imaṃ gijjhaṃ bādhayiṃsūti saddhiññeva agamāsi. Gijjhaṃ rañño dassesuṃ. Atha naṃ rājā pucchi tumhe nagaraṃ vilumpitvā vatthādīni gaṇhathāti. Āma mahārājāti. Kassa dinnānīti. Bārāṇasīseṭṭhissāti. Kiṃkāraṇāti. Amhākaṃ tena jīvitaṃ dinnaṃ, upakārassa nāma paccupakāraṃ kātuṃ vaṭṭati, tasmā adamhāti. Atha naṃ rājā gijjhā kira yojanasatamatthake ṭhatvā kuṇapaṃ passanti kasmā tvaṃ attano oḍḍitaṃ pāsaṃ na passasīti vatvā paṭhamaṃ gāthamāha

yannu gijjho yojanasataṃ kuṇapāni avekkhati,