kasmā jālañca pāsañca āsajjāpi na bujjhasīti.

Tattha yanti nipātamattaṃ. Nūti nāmatthe nipāto. Gijjho nāma yojanasataṃ atikkamitvā ṭhitāni kuṇapāni avekkhati passatīti attho. Āsajjāpīti āsādetvāpi sampāpuṇitvāpīti attho. Tvaṃ attano atthāya oḍḍitaṃ jālañca pāsañca patvāpi kasmā na bujjhasīti pucchi.

Gijjho tassa vacanaṃ sutvā dutiyaṃ gāthamāha

yadā parābhavo hoti poso jīvitasaṅkhaye