Satthā imaṃ atītaṃ dassetvā evaṃ bhikkhave tiracchānagatāpi agocare carantā amittahatthaṃ gacchanti gocare pana sake pettike visaye carantā amitte niggaṇhanti, tasmā tumhepi mā agocare caratha paravisaye, agocare bhikkhave carataṃ paravisaye lacchati māro otāraṃ lacchati māro ārammaṇaṃ, ko ca bhikkhave bhikkhuno agocaro paravisayo yadidaṃ pañcakāmaguṇā, katame pañca, cakkhuviññeyyā rūpā sotaviññeyyā saddā ghānaviññeyyā gandhā jivhāviññeyyā rasā kāyaviññeyyā phoṭṭhabbā, ayaṃ kho bhikakhave bhikkhuno agocaro Paravisayoti vatvā abhisambuddho hutvā paṭhamaṃ gāthamāha

seno balasā patamāno lāpaṃ gocaraṭṭhāyinaṃ

sahasā ajjhappatto va maraṇaṃ tenupāgamīti.

Tattha basasā patamānoti lāpaṃ gaṇhissāmīti balena thāmena patamāno. Gocaraṭṭhāyinanti sakavisayā nikkhamitvā gocaratthāya aṭavipariyante ṭhitaṃ. Ajjhappattoti sampatto. Tenupāgamīti tena kāraṇena maraṇaṃ patto.