Tattha yo ve mettena cittena sabbalokānukampatīti khattiyādīsu vā samaṇabrāhmaṇesu vā yo koci appanāppattena mettacittena sakalaṃ sattalokaṃ anukampeti. Uddhanti paṭhavitalato yāva nevasaññānāsaññāyatanabrahmalokā. Adhoti paṭhaviyā heṭṭhā yāva ussade mahāniraye. Tiriyanti manussaloke, yattakāni cakkavāḷāni tesu sabbesu ettake ṭhāne nibbattā sabbe sattā averā hontu Abyāpajjhā hontu anīghā hontu sukhī attānaṃ pariharantūti evaṃ bhāvitena mettena cittenāti attho. Appamāṇenāti appamāṇasattānaṃ ārammaṇattā appamāṇena. Sabbasoti sabbākārena. Uddhaṃ adho tiriyanti evaṃ sabbasugatiduggativasenāti attho. Appamāṇaṃ hitaṃ cittanti appamāṇaṃ katvā bhāvikaṃ sabbasattesu hitaṃ cittaṃ. Paripuṇṇanti avikalaṃ. Subhāvitanti suvaḍḍhitaṃ. Appamāṇacittassetaṃ nāmaṃ. Yaṃ pamāṇaṃ kataṃ kammanti yaṃ appamāṇaṃ appamāṇārammaṇanti evaṃ ārammaṇantikavasena ca vasibhāvappattivasena ca āvaḍḍhetvā kataṃ parittaṃ kāmāvacarakammaṃ. Na taṃ tatrāvasissatīti taṃ parittakammaṃ yantaṃ appamāṇaṃ hitaṃ cittanti saṅkhyaṃ gataṃ rūpāvacarakammaṃ tatra na avasissati. Yathā nāma mahoghena ajjhotthataṃ parittodakaṃ oghassa abbhantare tena asaṃhariyamānaṃ nāvasissati na tiṭaṭhati, atha kho mahogho va taṃ vikkhambhetvā tiṭṭhati, evameva parittakammaṃ tassa mahaggatakammassa abbhantare tena mahaggatakammena paricchinditvā agahitavipākokāsaṃ hutvā na avasissati na tiṭṭhati na sakkoti attano vipākaṃ dātuṃ, atha kho mahaggatakammameva taṃ ajjhottharitvā tiṭṭhati vipākaṃ detīti.

Evaṃ bodhisatto antevāsikānaṃ mettābhāvanāya ānisaṃsaṃ kathetvā aparihīnajjhāno brahmaloke nibbattitvā sattasaṃvaṭṭavivaṭṭakappe na imaṃ lokaṃ puna agamāsi.

Satthā imaṃ dhammadesanaṃ āharitvā jātakaṃ samodhānesi. Tadā isigaṇā buddhaparisā ahesuṃ, arako satthā pana ahamevāti.

Arakajātakaṃ navamaṃ.