Atīte bārāṇasiyaṃ brahmadatte rajjaṃ kārente bodhisatto himavantappadese sīhayoniyaṃ nibbattitvā bahunnaṃ sīhānaṃ rājā ahosi. So anekasīhaparivāro rajataguhāyaṃ vāsaṃ kappesi. Tassa avidūre ekissā guhāya eko sigālopi vasati. Athekadivasaṃ deve vassitvā vigate sabbe sīhā sīharājasseva guhādvāre sannipatitvā sīhanādaṃ nadantā sīhakīḷaṃ kīḷiṃsu. Tesaṃ evaṃ naditvā kīḷanakāle sopi sigālo vassi. Sīhā tassa saddaṃ sutvā ayampi sigālo amhehi saddhiṃ nadatīti lajjitā tuṇhī ahesuṃ. Tesaṃ tuṇhībhūtakāle bodhisattassa putto sīhapotako tāta ime sīhā naditvā sīhakīḷaṃ kīḷantā etassa saddaṃ sutvā lajjāya tuṇhī jātā, ko nāmeso attano saddena attānaṃ jānāpetīti pitaraṃ pucchanto paṭhamaṃ gāthamāha

ko nu saddena mahatā abhinādeti daddaraṃ,

taṃ sīhā nappaṭinadanti, ko nāmeso migābhibhūti.

Tattha abhinādeti daddaranti daddarapabbataṃ ekaninnādaṃ karoti. Migābhibhūti pitaraṃ ālapati. Ayamettha attho migābhibhūti migajeṭṭhaka sīharāja pucchāmi taṃ ko nāma esoti.