Atīte bārāṇasiyaṃ brahmadatte rajjaṃ kārente bodhisatto tassa aggamahesiyā kucchimhi paṭisandhiṃ gaṇhi. Tassa sotthinā jātassa nāmaggahaṇadivase asadisakumāroti nāmaṃ kariṃsu. Athassa ādhāvitvā paridhāvitvā vicaraṇakāle añño puññavā satto deviyā kucchimhi paṭisandhiṃ gaṇhi. Tassa sotthinā jātassa nāmaggahaṇadivase brahmadattakumāroti nāmaṃ kariṃsu. Tesu bodhisatto soḷasavassikakāle takkasilāyaṃ gantvā disāpāmokkhassa ācariyassa santike tayo vede aṭṭhārasa ca vijjuṭṭhānāni sabbasippāni ca uggaṇhitvā issāsasippe asadiso hutvā bārāṇasiṃ paccāgami. Rājā kālaṃ kurumāno asadisakumārassa rajjaṃ datvā brahmadattassa uparajjaṃ dethāti vatvā kālamakāsi. Tasmiṃ kālakate bodhisatto attano rajje diyamāne mayhaṃ rajjena attho natthīti paṭikkhipi. Brahmadattaṃ rajje abhisiñciṃsu. Bodhisatto mayhaṃ yasena attho natthīti kiñcipi na icchi. Kaniṭṭhe rajjaṃ kārente pakatiyā va rājākāreneva vasi. Rājapādamūlikā asadisakumāro rajjaṃ patthetīti vatvā rañño santike bodhisattaṃ paribhindiṃsu. Sopi tesaṃ vacanaṃ gahetvā paribhinnacitto bhātaraṃ me gaṇhathāti manusse uyyojesi. Atheko bodhisattassa atthacarako taṃ kāraṇaṃ ārocesi. Bodhisatto kaniṭṭhabhātikassa kuppitvā aññaṃ raṭṭhaṃ gantvā eko dhanuggaho āgantvā rājadvāre ṭhitoti rañño ārocāpesi. Rājā kittakaṃ bhogaṃ icchatīti pucchi. Ekasaṃvacchare satasahassanti. Sādhu āgacchatūti. Atha naṃ āgantvā samīpe ṭhitaṃ pucchi tvaṃ dhanuggahoti. Āma devāti. Sādhu maṃ upaṭṭhahīti. So tato paṭṭhāya rājānaṃ upaṭṭhahi. Tassa paribbayaṃ diyamānaṃ disvā atibahuṃ labhatīti porāṇadhanuggahā ujjhāyiṃsu. Athekadivasaṃ rājā uyyānaṃ gantvā maṅgalasilāpaṭṭasamīpe sāṇipākāraṃ parikkhipāpetvā ambarukkhamūle mahāsayane nipanno uddhaṃ olokento rukkhagge ekaṃ ambapiṇḍiṃ disvā imaṃ na sakkā abhirūhitvā gaṇhitunti dhanuggahe pakkosāpetvā imaṃ ambapiṇḍiṃ sarena chinditvā pātetuṃ sakkhissathāti āha. Na etaṃ deva amhākaṃ garu, devena pana no bahuvāre kammaṃ Diṭṭhapubbaṃ, adhunāgato dhanuggaho amhehi bahutaraṃ labhati, taṃ pātāpethāti. Rājā bodhisattaṃ pakkosāpetvā sakkhissasi tāta etaṃ pātetunti pucchi. Ekaṃ okāsaṃ labhamāno sakkhissāmīti. Kataraṃ okāsanti. Tumhākaṃ sayanassa antokāsanti. Rājā sayanaṃ harāpetvā okāsaṃ kāresi. Bodhisattassa hatthe dhanu natthi, nivāsanantare dhanuṃ sannayhitvā vicarati, tasmā sāṇiṃ laddhuṃ vaṭṭatīti āha. Rājā sāṇiṃ āharāpetvā parikkhipāpesi. Bodhisatto antosāṇiṃ pavisitvā uparinivatthavatthaṃ nīharitvā ekaṃ rattavatthaṃ nivāsetvā kacchaṃ bandhitvā ekaṃ rattavatthaṃ udare bandhitvā pasibbakato sandhiyuttaṃ khaggaṃ nīharitvā vāmapasse sannayhitvā suvaṇṇakañcukaṃ paṭimuñcitvā cāpanāliṃ piṭṭhiyaṃ sannayhitvā sandhiyuttaṃ meṇḍakamahādhanuṃ ādāya pavāḷavaṇṇajiyaṃ āropetvā uṇhīsaṃ sīse paṭimuñcitvā tikhiṇakhurappaṃ nakhehi parivattayamāno sāṇiṃ dvidhā katvā paṭhaviṃ phāletvā alaṅkatanāgakumāro viya nikkhamitvā sarakhipanaṭṭhānaṃ gantvā khurappaṃ sannayhitvā rājānaṃ āha kiṃ mahārāja etaṃ ambapiṇḍiṃ uddhaṃ ārohaṇakaṇḍena pātemi udāhu orohaṇakaṇḍenāti 2-. Tāta bahū mayā ārohaṇakaṇḍena pātentā diṭṭhapubbā, orohaṇakaṇḍena pātentā mayā na diṭṭhapubbā, orohaṇakaṇḍena pātehīti. Mahārāja idaṃ kaṇḍaṃ dūraṃ ārohissati, yāva cātummahārājikabhavanaṃ tāva gantvā sayaṃ orohissati, yāvassa orohaṇaṃ tāva tumhehi adhivāsetuṃ vaṭṭatīti.