Rājā sādhūti sampaṭicchi. Atha naṃ puna āha mahārāja idaṃ kaṇḍaṃ ārohamānaṃ ambapiṇḍivaṇṭaṃ yāvamajjhaṃ kantamānaṃ ārohissati, orohaṇaṃ kesaggamattampi ito vā etto vā agantvā odhiyaññeva patitvā ambapiṇḍiṃ gahetvā otarissati, passa mahārājāti. Vegaṃ janetvā kaṇḍaṃ khipi. Taṃ kaṇḍaṃ ambapiṇḍivaṇṭaṃ yāvamajjhaṃ kantamānaṃ abhirūhi. Bodhisatto idāni taṃ kaṇḍaṃ yāva cātummahārājikabhavanaṃ gataṃ bhavissatīti ñatvā paṭhamakhittakaṇḍato adhikataraṃ vegaṃ janetvā aññaṃ kaṇḍaṃ khipi. Taṃ gantvā purimakaṇḍaṃ puṅkhe paharitvā nivattāpetvā sayaṃ tāvatiṃsabhavanaṃ abhirūhi. Tattha naṃ devatā aggahesuṃ. Nivattanakaṇḍassa vātacchinnasaddo asanisaddo viya ahosi. Mahājanena kiṃsaddo esoti vutte bodhisatto nivattanakaṇḍassa saddoti vatvā attano attano sarīre kaṇḍassa patanabhayena bhītatasitaṃ mahājanaṃ mā bhāyitthāti assāsetvā kaṇḍassa bhūmiyaṃ patituṃ na dassāmīti āha. Kaṇḍaṃ otaramānaṃ kesaggamattampi ito vā etto vā agantvā odhiyaññeva patitvā ambapiṇḍiṃ chindi. Bodhisatto ambapiṇḍiyā ca kaṇḍassa ca bhūmiyaṃ patituṃ adatvā ākāse yeva sampaṭicchanto ekena hatthena ambapiṇḍiṃ ekena hatthena kaṇḍaṃ aggahesi. Mahājano taṃ acchariyaṃ disvā na no evarūpaṃ diṭṭhapubbanti mahāpurisaṃ pasaṃsati unnadati apphoṭeti aṅguliyo vidhunati celukkhepasahassāni pavatteti.
Rājaparisāya tuṭṭhahaṭṭhāya bodhisattassa dinnaṃ dhanakoṭimattaṃ ahosi. Rājāpissa ghanavassaṃ vassanto viya bahudhanaṃ mahantaṃ yasaṃ adāsi. Evaṃ bodhisatte tena raññā sakkate garukate tattha vasante, asadisakumāro kira bārāṇasiyaṃ natthīti satta rājāno āgantvā bārāṇasiṃ parivāretvā rajjaṃ vā detu yuddhaṃ vāti rañño paṇṇaṃ pesesuṃ. Rājā maraṇabhayabhīto kuhiṃ me bhātā vasatīti pucchitvā ekaṃ sāmantarājānaṃ upaṭṭhāsīti sutvā mama bhātike anāgacchante mayhaṃ jīvitaṃ natthi, gacchatha assa mama vacanena pāde vanditvā khamāpetvā gaṇhitvā āgacchathāti dūte pāhesi. Te gantvā bodhisattassa pavattiṃ ārocesuṃ. Bodhisatto taṃ rājānaṃ āpucchitvā bārāṇasiṃ paccāgantvā rājānaṃ mā bhāyīti samassāsetvā kaṇḍe akkharāni chinditvā ahaṃ asadisakumāro āgato aññaṃ ekakaṇḍaṃ khipanto sabbesaṃ vo jīvitaṃ māressāmi, jīvitena atthikā palāyantu, khuddakamakkhikāya pivanamattampi lohitaṃ anuppādemīti aṭṭālake ṭhatvā sattannaṃ rājūnaṃ bhuñjantānaṃ kāñcanapāṭimakule yeva kaṇḍaṃ pātesi. Te akkharāni disvā maraṇabhayabhītā sabbe palāyiṃsu. Evaṃ bodhisatto khuddakamakkhikāya pivanamattampi lohitaṃ anuppādetvā satta rājāno palāpetvā kaniṭṭhabhātaraṃ avaloketvā kāme pahāya isipabbajjaṃ pabbajitvā abhiññā ca samāpattiyo ca nibbattetvā jīvitapariyosāne brahmalokūpago ahosi.