bhātaraṃ sotthiṃ katvāna saññamaṃ ajjhupāgamīti.

Tattha asadisoti na kevalaṃ nāmeneva balaviriyapaññāhipi asadiso va. Mahabbaloti kāyabalenapi mahabbalo. Dūre pāhetīti yāva cātummahārājikabhavanā tāvatiṃsabhavanā kaṇḍaṃ pesetuṃ samatthatāya dūre pāheti. Akkhaṇavedhīti avirādhikavedhī. Atha vā akkhaṇaṃ vuccati vijju, yāva ekā vijju niccharati tāva tenobhāsena sattaṭṭhavāre kaṇḍāni gahetvā vijjhatīti akkhaṇavedhī. Mahākāyappadālinoti mahante kāye padāleti. Cammakāyo dārukāyo lohakāyo ayakāyo vālikakāyo udakakāyo phalakakāyoti ime sattakāyā nāma. Tattha añño cammakāyaṃ padālento mahisacammampi vinivijjhati. So pana satampi mahisacammāni vinivijjhati yeva. Añño aṭṭhaṅgulabahalaṃ udumbarapadaraṃ caturaṅgulabahalaṃ asanapadaraṃ vinivijjhati, so pana phalakasatampi ekato baddhaṃ vinivijjhati, tathā dvaṅgulabahalaṃ tambalohapaṭṭaṃ aṅgulabahalaṃ ayapaṭṭaṃ vālikasakaṭassa padarasakaṭassa vā pacchābhāge kaṇḍaṃ pavesetvā purabhāgena atipāteti. Pakatiyā udake catuusubhaṭṭhānaṃ kaṇḍaṃ pavesesi thale aṭṭhusubhanti evaṃ Imesaṃ sattannaṃ mahākāyānaṃ padālanato mahākāyappadālino. Sabbāmitteti sabbe amitte. Raṇaṃ katvāti yuddhaṃ katvā palāpesīti attho. Na ca kiñci viheṭhayīti ekampi na viheṭheyya. Aviheṭhayanto pana tehi saddhiṃ kaṇḍapesanena raṇaṃ katvā. Saññamaṃ ajjhupāgamīti sīlasaññamaṃ pabbajjaṃ upagatoti.

Evaṃ satthā imaṃ dhammadesanaṃ desetvā jātakaṃ samodhānesi. Tadā kaniṭṭhabhātā ānando ahosi, asadisakumāro pana ahamevāti.

Asadisajātakaṃ paṭhamaṃ.