มหานิปาตวณฺณนา

เตมิยชาตกํ

มา ปณฺฑิจฺจยํ วิภาวยาติ อิทํ สตฺถา เชตวเน วิหรนฺโต มหาภิเนกฺขมฺมปารมึ อารพฺภ กเถสิ ฯ เอกทิวสํ หิ ภิกฺขู ธมฺมสภายํ สนฺนิสินฺนา ภควโต มหาภิเนกฺขมฺมปารมึ วณฺณยนฺตา นิสีทึสุ ฯ สตฺถา ทิพฺพโสเตน ตํ สุตฺวา คนฺธกุฏิโต นิกฺขมิตฺวา ธมฺมสภายํ อาคนฺตฺวา กาย นุตฺถ ภิกฺขเว เอตรหิ กถาย สนฺนิสินฺนาติ ปุจฺฉิตฺวา อิมาย นามาติ วุตฺเต น ภิกฺขเว อิทาเนว มม ปูริตปารมิสฺส รชฺชํ ฉทฺเทตฺวา มหาภินิกฺขมนํ นาม อจฺฉริยํ อหํ หิ ปุพฺเพ อปริปกฺเก ญาเณ ปารมิโย ปูเรนฺโตปิ รชฺชํ ฉทฺเทตฺวา มหาภินิกฺขมนํ นิกฺขนฺโตเยวาติ วตฺวา ตุณฺหี อโหสิ เตหิ ยาจิโต อตีตํ อาหริ ฯ

อตีเต ภิกฺขเว พาราณสิยํ กาสิกราชา นาม ธมฺเมน สเมน รชฺชํ กาเรสิ ฯ ตสฺส โสฬสสหสฺสา นาฏกิตฺถิโย อเหสุํ ฯ ตาสุ เอกาปิ ปุตฺตํ วา ธีตรํ วา น ลภติ ฯ ตทา นาครา อมฺหากํ รญฺโญ วงฺสานุรกฺขิโต เอโก ปุตฺโตปิ นตฺถีติ กุสราชชาตเก อาคตนเยเนว ราชงฺคเณ สนฺนิปติตฺวา ราชานํ เทว ปุตฺตํ ปตฺเถถาติ อาหํสุ ฯ ตํ สุตฺวา ราชา ตสฺมึ ขเณ โสฬสสหสฺสา อิตฺถิโย ปกฺโกสาเปตฺวา ตุมฺเห ปุตฺตํ ปตฺเถถาติ อาณาเปสิ ฯ ตา อิตฺถิโย จนฺทาทีนํ เทวตานํ อายาจนอุปฏฺฐานาทีนิ กตฺวา ปตฺเถนฺติโยปิ ปุตฺตํ วา ธีตรํ วา น ลภึสุ ฯ อคฺคมเหสี ปนสฺส มทฺทราชธีตา จนฺทเทวี นาม สีลสมฺปนฺนา อโหสิ ฯ ราชา ภทฺเท ตวํปิ ปุตฺตํ ปตฺเถหีติ อาณาเปสิ ฯ เทวี ตสฺส รญฺโญ วจนํ สุตฺวา สาธูติ สมฺปฏิจฺฉิตฺวา ปุณฺณมีทิวเส อุโปสถํ สมาทยิตฺวา โอมุตฺตสพฺพาภรณา จุลฺลสยเน นิปนฺนา อตฺตโน สีลํ อาวชฺชมานา สจาหํ อขณฺฑสีลํ รกฺขามิ อิมินา สจฺเจน ปุตฺโต เม อุปฺปชฺชตูติ สจฺจกิริยํ อกาสิ ฯ