มหานิปาตวณฺณนา

เวสฺสนฺตรชาตกํ

ผุสฺสตี วรวณฺณาเภติ อิทํ สตฺถา กปิลวตฺถุสฺมึ อุปนิสฺสาย นิโคฺรธาเม วิหรนฺโต โปกฺขรวสฺสํ อารพฺภ กเถสิ ฯ

ยทา หิ สตฺถา ปวตฺติตปวรธมฺมจกฺโก อนุกฺกเมน ราชคหํ คนฺตฺวา ตตฺถ เหมนฺตํ วีตินาเมตฺวา อุทายิตฺเถเรน มคฺคุทฺเทสเกน วีสติสหสฺสขีณาสวปริวุโต ปฐมคมเนน ยาว กปิลวตฺถุํ อคมาสิ ฯ ตทา สกฺยราชาโน มยํ อิมํ สิทฺธตฺถกุมารํ อมฺหากํ ญาติเสฏฺฐํ ปสฺสิสฺสามาติ สนฺนิปติตฺวา ภควโต วสนฏฺฐานํ วิมํสมานา นิโคฺรธสกฺกสฺสาราโม รมฺมณีโยติ สลฺลกฺเขตฺวา ตตฺถ สพฺพํ ปฏิชคฺคนวิธึ กตฺวา คนฺธปุปฺผจุณฺณาทิหตฺถา ปจฺจุคฺคมนํ กโรนฺตา สพฺพาลงฺการปฏิมณฺฑิเต ทหรทหเร นาครทารเก จ นาครทาริกาโย จ ปฐมํ ปหิณึสุ ฯ ตโต ราชกุมาเร จ ราชกุมาริกาโย จ เตสํ อนฺตรา สามํ คนฺธปุปฺผจุณฺณาทีหิ สตฺถารํ ปูชยมานา ภควนฺตํ คเหตฺวา นิโคฺรธารามเมว อคมํสุ ฯ ตตฺถ ภควา วีสติสหสฺสขีณฺณาสวปริวุโต ปญฺญตฺตปวรพุทฺธาสเน นิสีทิ ฯ ตทา สากิยา มานชาติกา มนถทฺธา เต อยํ สิทฺธตฺถกุมาโร อมฺเหหิ ทหรตโร อมฺหากํ กนิฏฺโฐ ภาคิเนยฺโย ปุตฺโต นตฺตาติ จินฺเตตฺวา เต ทหรทหเร ราชกุมาเร อาหํสุ ตุมฺเห ภควนฺตํ วนฺทถ มยํ ตุมฺหากํ ปิฏฺฐิโต นิสีทิสฺสามาติ ฯ เตสุ เอวํ ภควนฺตํ อวนฺทิตฺวา นิสินฺเนสุ ภควา เตสํ อชฺฌาสยํ ญตฺวา น มํ ญาตโย วนฺทนฺติ หนฺทาหํ เต วนฺทาเปสฺสามีติ อภิญฺญาปาทกํ จตุตฺถชฺฌานํ สมาปชฺชิตฺวา ตโต ปฏฺฐาย อากาสํ อพฺภุคฺคนฺตฺวา เตสํ ญาตีนํ สีเส ปาทปงฺสุํ โอกีริยมาโน วิย คณฺฑามฺพรุกฺขมูเล ยมกปาฏิหาริยสทิสํ ปาฏิหาริยํ อกาสิ ฯ ตทา สุทฺโธทนมหาราชา ตํ อจฺฉริยํ ทิสฺวา อาห ภนฺเต ตุมฺหากํ ชาตทิวเส อิสิสฺส กาฬเทวลสฺส ชฏิลสฺส วนฺทนตฺถํ อุปนีตานํ โว ปาเท ปริวตฺเตตฺวา พฺราหฺมณสฺส มตฺถเก ฐิเต ทิสฺวา อหํ ตุมฺหากํ วนฺทึ อยํ เม ปฐมวนฺทนา วปฺปมงฺคลทิวเส ชมฺพูฉายาย สิริสยเน นิปนฺนานํ โว ชมฺพูฉายาย อปริวตฺตนํ ทิสฺวา อหํ ตุมฺหากํ ปาเท วนฺทึ อยํ เม ทุติยวนฺทนา อิทานิ อิมํ อทิฏฺฐปุพฺพํ ปาฏิหาริยํ ทิสฺวาปิ อหํ ตุมฺหากํ ปาเท วนฺทามิ อยํ เม ตติยวนฺทนาติ ฯ ตสฺมึ รญฺญา ปน วนฺทิเต อวนฺทิตฺวา ฐาตุํ สมตฺโถ นาม เอกสากิโยปิ นาโหสิ ฯ สพฺเพปิ เต วนฺทึสุเยว ฯ อิติ ภควา ญาตโย วนฺทาเปตฺวา อากาสโต โอตริตฺวา ปญฺญตฺตปวรพุทฺธาสเน นิสีทิ ฯ นิสินฺเน ปน ภควติ สิกฺขปฺปตฺโต ญาตสมาคโม อโหสิ ฯ สพฺเพปิ เอกคฺคจิตฺตา หุตฺวา นิสีทึสุ ฯ ตโต มหาเมโฆ อุฏฺฐหิตฺวา โปกฺขรวสฺสํ วสฺสิ ฯ ตามฺพวณฺณํ อุทกํ เหฏฺฐา วิรวนฺตํ คจฺฉติ ฯ เย เตมิตุกามาว เต เตเมนฺติ อเตมิตุกามสฺส สรีเร เอกพินฺธุมตฺตมปิ น ปตติ ฯ ตํ ทิสฺวา สพฺเพ เต อจฺฉริยพฺภูตชาตา อเหสุํ ฯ อโห อจฺฉริยํ อโห อพฺภูตํ อโห พุทฺธานํ อานุภาโว เยสํ ญาตีนํ สมาคเม มหาเมโฆ เอวรูปํ โปกฺขรวสฺสํ วสฺสีติ กถํ สมุฏฺฐาเปสุํ ฯ ตํ สุตฺวา สตฺถา กาย นุตฺถ ภิกฺขเว เอตรหิ กถาย สนฺนิสินฺนาติ ปุจฺฉิตฺวา อิมาย นามาติ วุตฺเต น ภิกฺขเว อิทาเนว สพฺเพปิ โพธิสตฺตกาเล มม ญาติสมาคเม เอวรูโป มหาเมโฆ โปกฺขรวสฺสํ วสฺสิเยวาติ วตฺวา ตุณฺหี อโหสิ เตหิ ยาจิโต อตีตํ อาหริ ฯ