เอวญฺจ ปน วตฺวา ปณฺฑิต มหาปรกฺกม กุหึ ตํ เนสฺสามีติ ปุจฺฉิ ฯ มิถิลนครนฺติ วุตฺเต สา มหาสตฺตํ มาลากลาปํ วิย อุกฺขิปิตฺวา อุโภหิ พาหาหิ ปคฺคยฺห อุเร นิปชฺชาเปตฺวา ปิยปุตฺตํ วิย อาทาย คจฺฉนฺตี อากาเส ปกฺขนฺทิ ฯ มหาสตฺโต สตฺตาหํ โลโณทเกน อุปกิลิฏฺฐสรีโร ทิพฺพผสฺเสน ผุฏฺโฐ นิทฺทํ โอกฺกมิ ฯ อถ นํ สา มิถิลํ เนตฺวา อมฺพวเน มงฺคลสิลาปตฺเต ทกฺขิณปสฺเสน นิปชฺชาเปตฺวา อุยฺยาเน เทวตาหิ ตสฺส อารกฺขํ คาหาเปตฺวา สกฏฺฐานเมว คตา ฯ ตทา โปลชนกสฺส ปุตฺโต นตฺถิ เอกา ปนสฺส ธีตา สีวลีเทวี นาม อโหสิ ปณฺฑิตา พยตฺตา ฯ อถ อมจฺจา ตเมว ราชานํ มรณมญฺเจ นิปนฺนํ ปุจฺฉึสุ มหาราช ตุมฺเหสุ ทิวงฺคเตสุ กสฺส รชฺชํ ทสฺสามาติ ฯ อถ ราชา มม ธีตรํ สีวลีเทวึ อาราเธตุํ สมตฺถสฺส รชฺชํ เทถ โย วา ปน จตุรสฺส ปลฺลงฺกสฺส อุสฺสีสกํ ชานาติ โย วา ปน สหสฺสถามธนุํ อาโรเปตุํ สกฺโกติ โย วา ปน โสฬสมหานิธึ นีหริตุํ สกฺโกติ ตสฺส รชฺชํ เทถาติ อาห ฯ เทว เตสํ โน นิธีนํ อุทานํ กเถถาติ อาหํสุ ฯ

ราชา

สุริยุคฺคมเน นิธิ อโถ โอคฺคมเน นิธิ

อนฺโต นิธิ พหิ นิธิ น อนฺโต น พหิ นิธิ