โส กิร ทสวสฺสสหสฺสายุกกาเล นิพฺพตฺโต สตฺตวสฺสสหสฺสานิ รชฺชํ กาเรตฺวา ตีณิ วสฺสสหสฺสานิ อวสิฏฺเฐ อายุมฺหิ ปพฺพชิ ฯ

ปพฺพชนฺโต ปเนส อุยฺยานทฺวาเร อมฺพรุกฺขสฺส ทิฏฺฐกาลโต ปฏฺฐาย จตฺตาโร มาเส อาคาเร วสิตฺวา อิมมฺหา ราชเวสา ปพฺพชิตเวโส วรตโร ปพฺพชิสฺสามีติ จินฺเตตฺวา อุปฏฺฐากํ รหสฺเสน อาณาเปสิ ตาต กญฺจิ อชานาเปตฺวา อนฺตราปณโต กาสาววตฺถานิ เจว มตฺติกาปตฺตญฺจ อาหราหีติ ฯ โส ตถา อกาสิ ฯ ราชา กปฺปกํ ปกฺโกสาเปตฺวา เกสมสฺสุํ โอหาเรตฺวา กปฺปกสฺส คามวรํ ทตฺวา กปฺปกํ อุยฺโยเชตฺวา เอกํ กาสาวํ นิวาเสตฺวา เอกํ ปารุปิตฺวา เอกํ องฺเส กตฺวา มตฺติกาปตฺตํ ถวิกาย โอสาเมตฺวา องฺเส ลคฺเคตฺวา ตโต กตฺตรทณฺฑํ คเหตฺวา มหาตเล กติปเย วาเร ปจฺเจกพุทฺธลีลาย อปราปรํ จงฺกมิตฺวา อโห สุขํ ปรมสุขํ ปพฺพชฺชา นรสุขนฺติ อุทานํ อุทาเนสิ ฯ โส ตํ ทิวสํ ตตฺเถว วสิตฺวา ปุนทิวเส สุริยุคฺคมนเวลาย ปาสาทา โอตริตุํ อารภิ ฯ ตทา สีวลีเทวี ตา สตฺตสตา วลฺลภิตฺถิโย ปกฺโกสาเปตฺวา จิรํ น ทิฏฺโฐ โน ราชา จตฺตาโร มาสา อติกฺกนฺตา อชฺช นํ ปสฺสิสฺสาม สพฺพาลงฺกาเรหิ อลงฺกริตฺวา ตุมฺเห ยถาพลํ อิตฺถีกุตฺตากปฺปภาวหสิตกถิตคีตาทิเก วิลาเส ทสฺเสตฺวา ตํ กิเลสพนฺธเนน พนฺธิตุํ วายเมยฺยาถาติ อาห ฯ สาปิ อลงฺกตปฏิยตฺตา ตาหิ สทฺธึ ราชานํ ปสฺสิสฺสามีติ ปาสาทํ อภิรุหนฺตี ตํ โอตรนฺตํ ทิสฺวาปิ น สญฺชานนฺตี รญฺโญ โอวาทํ ทาตุํ อาคโต ปจฺเจกพุทโธ ภวิสฺสตีติ สญฺญาย ตํ วนฺทิตฺวา เอกมนฺตํ อฏฺฐาสิ ฯ มหาสตฺโตปิ ปาสาทา โอตริ ฯ อิตราปิ ปาสาทํ อภิรุหนฺตี สิริสยนปิฏฺเฐ รญฺโญ ภมรปตฺตวณฺเณ เกเส จ ปสาธนภณฺฑญฺจ ทิสฺวา เนโส ปจฺเจกพุทฺโธ อมฺหากํ ปิยสามิโก ภวิสฺสติ เอถ นํ ยาจิตฺวา นิวตฺเตสฺสามาติ วตฺวา มหาตลโต โอตริตฺวา ราชงฺคเณ ราชานํ สมฺปาปุณิ ปตฺวา จ ปน สพฺพาหิ ตาหิ สทฺธึ เกเส โมเจตฺวา ปิฏฺฐิยํ วิกีริตฺวา หตฺเถหิ หทยํ ปหริตฺวา กสฺมา เอวรูปํ กโรถ มหาราชาติ อติกลูนํ ปริเทวมานา ราชานํ อนุพนฺธิ ฯ อถ สกลนครํ สํขุพฺภิตํ อโหสิ ฯ เตปิ ราชา โน กิร ปพฺพชิโต กุโต ปุน เอวรูปํ ธมฺมิกํ ราชานํ ลภิสฺสามาติ วตฺวา โรทมานา ราชานํ อนุพนฺธึสุ ฯ ตตฺถ ตาสํ อิตฺถีนํ ปริเทวนสทฺทญฺเจว ปริเทวนฺติโยปิ ตาโย ปหาย รญฺโญ คมนญฺจ อาวีกโรนฺโต สตฺถา อาห