เอหิ ราช นิวตฺตสฺสุ มา รฏฺฐํ วินสฺสา อิทนฺติ ฯ

ตตฺถ อฏวิโยติ มหาราช ตุมฺเหสุ ธรนฺเตสุเยว อฏวิโย โจรา สมุปฺปนฺนา ฯ รฏฺฐนฺติ ตถารูปํ ธมฺมรกฺขิตํ ตว รฏฺฐํ วิทฺธํเสนฺติ ฯ เอหิ ราช นิวตฺตสฺสุ อิทํ ตว รฏฺฐํ มา วินสฺสตุ ฯ

ตํ สุตฺวา ราชา มยิ ธรนฺเตเยว โจรา อุฏฺฐาย รฏฺฐํ วิทฺธํเสนฺตา นาม นตฺถิ สีวลีเทวิยา กิริยา เอสา ภวิสฺสตีติ จินฺเตตฺวา ตํ อปฺปฏิภาณํ กโรนฺโต อาห

สุสุขํ วต ชีวาม เยสนฺโน นตฺถิ กิญฺจนํ