เอวํ วุตฺเตปิ มหาชโน ราชานํ อนุพนฺธติเยว ฯ อถสฺส เอตทโหสิ อยํ มหาชโน นิวตฺติตุํ น อิจฺฉติ นิวตฺเตสฺสามิ นนฺติ อฑฺฒคาวุตมคฺคํ คตกาเล นิวตฺเตตฺวา มหาปเถ ฐิโต อมจฺเจ ปุจฺฉิ กสฺเสตํ รชฺชนฺติ ฯ ตุมฺหากํ เทวาติ ฯ เตนหิ ตาตา อิมํ เลขํ อนฺตรํ กโรนฺตสฺส ราชทณฺฑํ กโรถาติ วตฺวา กตฺตรทณฺเฑน ติริยํ เลขํ อากฑฺฒิ ฯ เตชวตา รญฺญา กตํ เลขํ โกจิ อนฺตรํ กาตุํ นาสกฺขิ ฯ มหาชโน เลขํ อุสฺสีสเก กตฺวา พลวปริเทวํ ปริเทวิ ฯ เทวีปิ ตํ เลขํ อนฺตรํ กาตุํ อสกฺโกนฺตี ราชานํ ปิฏฺฐึ ทตฺวา คจฺฉนฺตํ ทิสฺวา โสกํ สณฺฐาเรตุํ อสกฺโกนฺตี อุรํ ปหริตฺวา มหามคฺเค ติริยํ ปติตฺวา ปริวตฺตมานา ตํ อติกฺกมิตฺวา อคมาสิ ฯ มหาชโน เลขาสามิเกหิ เลขา ภินฺนาติ เทวิยา คตมคฺเคเนว คโต ฯ มหาสตฺโต อุตฺตรหิมวนฺตาภิมุโข อคมาสิ ฯ เทวีปิ สพฺพเสนาพลพาหนํ อาทาย เตเนว สทฺธึ คตา ฯ ราชา มหาชนํ นิวตฺเตตุํ อสกฺโกนฺโตเยว สฏฺฐีโยชนมคฺคํ คโต ฯ

ตทา นารโท นาม ตาปโส หิมวนฺเต สุวณฺณคุหายํ วสิตฺวา ปญฺจาภิญฺญาฌานสุเขน วีตินาเมตฺวา สตฺตาหํ อติกฺกมิตฺวา ฌานสุขโต วุฏฺฐาย อโห สุขํ ปรมํ สุขนฺติ อุทานํ อุทาเนสิ ฯ โส อตฺถิ นุ โข โกจิ ชมฺพูทีปตเล อิมํ สุขํ ปริเยสตีติ ทิพฺเพน จกฺขุนา โลกํ โวโลเกนฺโต มหาชนกํ พุทฺธงฺกุรํ ทิสฺวา โส ราชา มหาภินิกฺขมนํ นิกฺขมนฺโต สีวลีเทวิปฺปมุขํ มหาชนํ นิวตฺเตตุํ น สกฺโกติ อนฺตรายํปิสฺส กเรยฺย ภิยฺโยโส มตฺตาย ตสฺส ทฬฺหสมาทานตฺถํ โอวาทํ ทสฺสามีติ จินฺเตตฺวา อิทฺธิพเลนาคนฺตฺวา รญฺโญ ปุรโต อากาเส ฐิโต ว ตสฺส อุสฺสาหํ ชเนตุํ อาห

กิมฺเหโส มหโต โฆโส กานุ คาเมว กีฬิยา

สมณ ตเวว ปุจฺฉามิ กตฺเถโสภิสโฏ ชโนติ ฯ