ตตฺถ โลกวตฺตนฺตนฺติ วฏฺฏานุคตสฺส พาลโลกสฺส วตฺตํ ปเวณึ อหํ อทฺทสํ ตํ ทิสฺวา ปพฺพชิโตมฺหีติ ทีเปติ ฯ ขชฺชนฺตํ กทฺทมีกตนฺติ กิเลเสหิ ขชฺชนฺตํ เตเหว จ กทฺทมีกตํ โลกํ ทิสฺวา ฯ ยตฺถ สนฺโนติ ยมฺหิ กิเลสวตฺถุมฺหิ สนฺโน ลคฺโค นิมฺมุคฺโค ปุถุชฺชโน ตตฺถ ลคฺคา พหู สตฺตา หญฺญนฺติ เจว อฏฺฏพนฺธนาทีหิ ๑- จ วชฺฌนฺติ ฯ เอตาหนฺติ อหํปิ สเจ เอตฺถ วชฺฌิสฺสามิ อิเม สตฺตา วิย วิหญฺญิสฺสามิ วชฺฌิสฺสามิ จาติ เอตเทว การณํ อตฺตโน อุปมํ กตฺวา ภิกฺขุโก ชาโตติ อตฺโถ ฯ มิคาชินาติ ตํ อาลปติ ฯ กถํ ปน เตน ตสฺส นามํ ญาตนฺติ ฯ ปฏิสนฺถารกาเล ปฐเมว ปุจฺฉิตตฺตา ฯ

ตาปโส ตํ การณํ วิตฺถารโต โสตุกาโม หุตฺวา คาถมาห

โก นุ เต ภควา สตฺถา กสฺเสตํ วจนํ สุจึ

น หิ กปฺปํ วา วิชฺชํ วา ปจฺจกฺขาย รเถสภ