ตสฺส เต สคฺคกามสฺส เอกตฺตมุปโรจตนฺติ ฯ

ตตฺถ วิสาลํ วิยาติ วิตฺถิณฺณํ วิย หุตฺวา ขายติ ฯ อปฺปตฺวา ปรมํ ลิงฺคนฺติ ปุรโต วงฺกฏฺฐานํ อปฺปตฺวา ฯ นุชฺชุภาวายาติ น อุชุภาวาย ฯ อิทํ วุตฺตํ โหติ วิสาเล ขายมาเน ปุรโต อุชุกฏฺฐานํ น ปาปุณิสฺสติ ตสฺมึ อสมฺปตฺเต อทิสฺสมาเน อุชุภาวาย กิจฺจํ น กปฺปติ น สมฺปชฺชตีติ ฯ สมฺปตฺวาติ จกฺขุนา ปตฺวา ทิสฺวาติ อตฺโถ ฯ วิวาทปฺปตฺโตติ ยถา ทุติเย อกฺขิมฺหิ อุมฺมิลิเต ลิงฺคํ น ปญฺญายติ วงฺกฏฺฐานํปิ อุชุกํ ปญฺญายติ อุชุกฏฺฐานํปิ วงฺกํ ปญฺญายตีติ วิวาโท โหติ เอวนฺเต สมณสฺสาปิ ทุติโย วิวาทมาปนฺโน โหติ กลหํ กโรติ นานาคาหํ คณฺหติ ฯ เกเนโกติ เอโก ปน เกน สทฺธึ วิวทิสฺสติ ฯ เอกตฺตมุปโรจตนฺติ เอกีภาโว เต รุจฺจตุ ฯ สมณา นาม ภคินึปิ อาทาย น จรนฺติ กึ ปน ตวํ อุตฺตมรูปธรํ ภริยํ คเหตฺวา วิจรสิ อยนฺเต อนฺตรายํ กริสฺสติ อิมํ นีหริตฺวา เอกโก ว สมณธมฺมํ ยุตฺตํ กโรหีติ โส ตํ โอวทิ ฯ โส เอวมสฺส โอวาทํ ทตฺวา ตุณฺหี อโหสิ ฯ มหาสตฺโต ปิณฺฑาย จริตฺวา มิสฺสกภตฺตํ สํกฑฺฒิตฺวา นครา นิกฺขมิตฺวา อุทกผาสุกฏฺฐาเน นิสีทิตฺวา ปริภุญฺชิ ฯ โส กตภตฺตกิจฺโจ มุขํ วิขาเลตฺวา ปตฺตํ โธวิตฺวา ถวิกาย โอสาเรตฺวา สีวลึ อามนฺเตตฺวา อาห

สุณสิ สีวลิ คาถา อุสุกาเรน ปเวทิตา

เปสิโย มํ ครหิโต ทุติยสฺเสว สา คติ