ตํ ทิวสํ ปน สตฺถา ปจฺจูสกาเล โลกํ โอโลเกนฺโต อิมสฺส กุลปุตฺตสฺส อุปนิสฺสยํ อทฺทส ฯ โส ตสฺส อาคมนกาเล มาตุโปสกสุตฺเตน มาตาปิตูนํ คุณํ วณฺเณสิ ฯ โส ปน ภิกฺขุ ปริสปริยนฺเต ฐตฺวา มธุรธมฺมกถํ สุณนฺโต ว จินฺเตสิ อหํ คิหี หุตฺวา มาตาปิตโร ปฏิชคฺคิตุํ สกฺโกมีติ จินฺเตสึ สตฺถา ปน ปพฺพชิโตปิ สมาโน มาตาปิตูนํ อุปการโก นามาติ วทติ สจาหํ สตฺถารํ อทิสฺวา ว คโต อสฺสํ เอวรูปาย ปพฺพชฺชาย ปริหีโน ภเวยฺยํ อิทานิ ปน คิหี อหุตฺวา ปพฺพชิโตว สมาโน มาตาปิตโร โปเสสฺสามีติ ฯ โส สตฺถารํ วนฺทิตฺวา เชตวนา นิกฺขมิตฺวา สลากคฺคํ คนฺตฺวา สลากภตฺตญฺจ สลากยาคุญฺจ คเหตฺวา ทฺวาทส วสฺสานิ อรญฺเญ วุฏฺฐภิกฺขุ ปาราชิกปตฺโต วิย อโหสิ ฯ โส ปาโตว สาวตฺถิยํ ปวิสิตฺวา กึ นุโข ปฐมํ ยาคุํ คณฺหิสฺสามิ อุทาหุ มาตาปิตโร ปสฺสิสฺสามีติ จินฺเตตฺวา กปณานํ สนฺติกํ ตุจฺฉหตฺเถน คนฺตุํ อยุตฺตนฺติ จินฺเตตฺวา ยาคุํ คเหตฺวา เอเตสํ โปราณเคหทฺวารํ คโต ฯ มาตาปิตโรปิสฺส ยาคุํ ภิกฺขาย จริตฺวา ปรเคหภิตฺตึ นิสฺสาย วิหรนฺติ ฯ โส อุปคนฺตฺวา เต นิสินฺนเก กปณภาวมาปนฺเน ทิสฺวา อุปฺปนฺนโสโก อสฺสุปณฺเณหิ เนตฺเตหิ เตสํ อวิทูเร อฏฺฐาสิ ฯ เต ตํ ทิสฺวาปิ น สญฺชานึสุ ฯ อถสฺส มาตา ภิกฺขุ ภิกฺขตฺถาย ฐิโต ภวิสฺสตีติ สญฺญาย ภนฺเต ตุมฺหากํ ทาตพฺพยุตฺตกํ นตฺถิ อติจฺฉถ ภนฺเตติ อาห ฯ โส ตสฺสา กถํ สุตฺวา อุปฺปนฺนพลวโสโก หทยรูปํ โสกํ คเหตฺวา อสฺสุปุณฺเณหิ เนตฺเตหิ ตตฺเถว อฏฺฐาสิ ตาย ทุติยมฺปิ ตติยมฺปิ วุจฺจมาโนปิ อฏฺฐาสิเยว ฯ อถสฺส ปิตา มาตรํ อาห คจฺฉ ตํ ชานาหิ ปุตฺโต นุโข โน เอโสติ ฯ สา อุฏฺฐาย ตสฺส สนฺติกํ คนฺตวา โอโลเกตฺวา ตํ สญฺชานิตฺวา ปุตฺตสฺส ปาทมูเล นิปติตฺวา ปริเทวิ ฯ ปิตาปิสฺส ตตฺเถว คนฺตฺวา ปโรทิ ฯ มหนฺตํ การุญฺญํ อโหสิ ฯ โสปิ มาตาปิตโร ทิสฺวา สกภาเวน สณฺฐาเรตุํ อสกฺโกนฺโต อสฺสูนิ ปวตฺเตสิ ฯ โส โสกํ อธิวาเสตฺวา อมฺมตาต มา จินฺตยิตฺถ อหํ โว โปเสสฺสามีติ มาตาปิตโร อสฺสาเสตฺวา ยาคุํ ปาเยตฺวา เอกมนฺเต นิสีทาเปตฺวา ปุน ภิกฺขํ อาหริตฺวา เต โภเชตฺวา อตฺตโน ภิกฺขํ ปริเยสิตฺวา เตสํ สนฺติกํ คนฺตวา ปุน ภตฺเตน ปุจฺฉิตฺวา เตหิ น ภุญฺชามาติ วุตฺเต สยํ ภตฺตกิจฺจํ กตฺวา เต เอกมนฺเต วสาเปสิ ฯ โส ตโต ปฏฺฐาย อิมินา นิยาเมน มาตาปิตโร ปฏิชคฺคิ ฯ อตฺตนา ลทฺธานิ ปกฺขิกภตฺตาทีนิปิ เตสํเยว ทตฺวา สยํ ภิกฺขาย จริตฺวา ลภมาโน ภุญฺชติ อลภมาโน น ภุญฺชติ วสฺสาวาสิกมฺปิ อญฺญํปิ ยํ กิญฺจิ ลาภํ ลภิตฺวา เตสํเยว เทติ เตหิ ปริภุตฺตํ ชิณฺณปิโลติกํ อคฺคฬํ กตฺวา โธวิตฺวา รชิตฺวา สยํ ปริภุญฺชติ ฯ ภิกฺขํ ลภมานทิวสํ ปนสฺส อปฺปํ อลภมานทิวสา พหุตรา อเหสุํ ฯ อถสฺส นิวาสนปารุปฺปนํปิ อติลูขํ โหติ ฯ โส มาตาปิตโร ปฏิชคฺคนฺโตเยว อปรภาเค กีโส ลูโข ทุพฺพณฺโณ อุปฺปณฺฑุปฺปณฺฑุกชาโต ธมนิสณฺฐตคตฺโต อโหสิ ฯ อถ นํ สนฺทิฏฺฐา สมฺภตฺตา ภิกฺขู ทิสฺวา ปุจฺฉึสุ อาวุโส ปุพฺเพ ตว สรีรวณฺโณ โสภติ อิทานิ ปน กีโส ลูโข ทุพฺพณฺโณ อุปฺปณฺฑุปฺปณฺฑุกชาโต ธมนิสณฺฐตคตฺโตสิ พยาธิ นุโข เต อุปฺปนฺโนติ ฯ โส นตฺถิ เม อาวุโส พยาธิ อปิจ ปลิโพโธ เม อตฺถีติ ตํ ปวุตฺตึ อาโรเจสิ ฯ อาวุโส สตฺถา สทฺธาเทยฺยํ วินิปาเตตุํ น เทติ ตวํ ปน สทฺธาเทยฺยํ คเหตฺวา คิหีนํ ททมาโน อยุตฺตํ กโรสีติ อาหํสุ ฯ โส เตสํ กถํ สุตฺวา ลชฺชิโต โอหิยิ ฯ เต เอตฺตเกนาปิ อสนฺตุฏฺฐา ภควโต สนฺติกํ คนฺตวา ภนฺเต อสุโก นาม ภิกฺขุ สทฺธาเทยฺยํ วินิปาเตตฺวา คิหิโน โปเสสีติ สตฺถุโน อาโรเจสุํ ฯ สตฺถา ตํ ภิกฺขุํ ปกฺโกสาเปตฺวา สจฺจํ กิร ตวํ ภิกฺขุ สทฺธาเทยฺยํ คเหตฺวา คิหิโน โปเสสีติ ปุจฺฉิตฺวา สจฺจํ ภนฺเตติ วุตฺเต ตสฺส ตํ กิริยํ วณฺเณตุกาโม อตฺตโน จ ปุพฺพจริยํ ปกาเสตุกาโม หุตฺวา ภิกฺขุ ตวํ คิหิโน โปเสนฺโต เก โปเสสีติ ปุจฺฉิ ฯ มาตาปิตโร เม ภนฺเตติ ฯ สตฺถา ตสฺส อุสฺสาหํ ชเนตุํ สาธุ สาธุ ภิกฺขูติ ติกฺขตฺตุํ สาธุการํ ทตฺวา ตวํ มยา คตมคฺเค ฐิโต อหมฺปิ ปุพฺพจริยํ จรนฺโต มาตาปิตโร โปเสสินฺติ อาห ฯ โส ภิกฺขุ อสฺสาสํ ปฏิลภิ ฯ อถ สตฺถา ตาย ปุพฺพจริยาย อาวีกรณตฺถํ เตหิ ภิกฺขูหิ ยาจิโต อตีตํ อาหริ ฯ