อตีเต ภิกฺขเว พาราณสินครโต อวิทูเร นทิยา โอริมตีเร เอโก เนสาทคาโม อโหสิ ฯ ปรตีเรปิ เอโก เนสาทคาโม อโหสิ ฯ เอเกกสฺมึ คาเม ปญฺจ ปญฺจ กุลสตานิ วสนฺติ ฯ ทฺวีสุ คาเมสุ เทฺว เนสาทเชฏฺฐกา สหายกา อเหสุํ ฯ เต ทหรกาเลเยว เอวํ กติกํ กรึสุ สเจ อมฺเหสุ เอกสฺส ธีตา โหติ เอกสฺส ปุตฺโต เตสํ อาวาหวิวาหํ กโรมาติ ฯ อถ โอริมตีเร คามเชฏฺฐกสฺส เคเห ปุตฺโต วิชายิ ฯ ชาตกฺขเณเยวสฺสทุกูเลน ปฏิคฺคหิตตฺตา ทุกูโล ตเวว นามํ กรึสุ ฯ อิตรสฺส เคเห ธีตา วิชายิ ฯ ตสฺสา ปรตีเร ชาตตฺตา ปาริกาติ นามํ กรึสุ ฯ เต อุโภปิ อภิรูปา ปาสาทิกา สุวณฺณวณฺณา อเหสุํ เต เนสาทกุเล ชาตาปิ ปาณาติปาตนฺนาม น กรึสุ ฯ อปรภาเค โสฬสวสฺสุทฺเทสิกํ ทุกูลกุมารํ มาตาปิตโร อาหํสุ ตาต กุมาริกํ เต อาเนสฺสามาติ ฯ โส ปน พฺรหฺมโลกโต อาคโต สุทฺธสตฺโต อุโภปิ กณฺเณ ปิทหิตฺวา น เม ฆราวาเสน อตฺโถ อมฺมตาต มา เอวํ อวจุตฺถาติ วตฺวา ยาว ทุติยมฺปิ ตติยมฺปิ วุจฺจมาโนปิ น อิจฺฉิ ฯ ปาริกาปิ มาตาปิตูหิ อมฺม อมฺหากํ สหายกสฺส ปุตฺโต อตฺถิ โส อภิรูโป ปาสาทิโก สุวณฺณวณฺโณ ตสฺส ตํ ทสฺสามาติ วุตฺตาปิ ตเถว วตฺวา อุโภ กณฺเณ ปิทหิ ฯ สาปิ พฺรหฺมโลกโต อาคตา สุทฺธสตฺตา ฯ ตทา ทุกูลกุมาโรปิ ตสฺสา รหสฺเสน สาสนํ ปหิณิ สเจ ปาริกา เมถุนธมฺเมน อตฺถิกา อญฺญสฺส เคหํ คจฺฉตุ มม เมถุนฉนฺโท นตฺถีติ ฯ สาปิ ตสฺส ตเถว สาสนํ เปเสสิ ฯ มาตาปิตโร ปน เตสํ อนิจฺฉมานานญฺเญว อาวาหวิวาหํ กรึสุ ฯ เต อุโภปิ กิเลสสมุทฺทํ อโนตริตฺวา เทฺว มหาพฺรหฺมาโน วิย เอกโต วสึสุ ฯ ทุกูลกุมาโร ปน มจฺฉํ วา มิคํ วา น มาเรติ อนฺตมโส อาหฏมํสํปิ น วิกฺกีณาติ ฯ อถ นํ มาตาปิตโร วทึสุ ตาต ตวํ เนสาทกุเล นิพฺพตฺโตปิ เนว ฆราวาสํ อิจฺฉสิ น ปาณวธํ กโรสิ กินฺนาม กริสฺสสีติ ฯ โส เอวมาห อมฺมตาต ตุมฺเหสุ อนุชานนฺเตสุ มยํ ปพฺพชิสฺสามาติ ฯ ตํ สุตฺวา มาตาปิตโร เตนหิ ปพฺพชถาติ อนุชานึสุ ฯ เต ตุฏฺฐหฏฺฐา มาตาปิตโร วนฺทิตฺวา คามโต นิกฺขมฺม อนุปุพฺเพน คงฺคาตีเรน หิมวนฺตํ ปวิสิตฺวา ยสฺมึ ฐาเน มิคสมฺมตา นาม นที หิมวนฺตโต โอตริตฺวา คงฺคํ ปตฺตา ตํ ฐานํ คนฺตฺวา คงฺคํ ปหาย มิคสมฺมตาภิมุขา อคมํสุ ฯ

ตสฺมึ ขเณ สกฺกสฺส ภวนํ อุณฺหาการํ ทสฺเสติ ฯ สกฺโก อาวชฺเชนฺโต ตํ การณํ ญตฺวา วิสฺสุกมฺมํ อามนฺเตตฺวา ตาต วิสฺสุกมฺม เทฺว มหาปุริสา คามา นิกฺขมิตฺวา อิสิปพฺพชฺชํ ปพฺพชิตุกามา หิมวนฺตํ ปวิฏฺฐา เตสํ นิวาสนฏฺฐานํ ลทฺธุํ วฏฺฏติ มิคสมฺมตนทิโต อฑฺฒโฆสพฺภนฺตเร เอเตสํ ปณฺณสาลญฺจ ปพฺพชิตปริกฺขาเร จ มาเปตฺวา เอหีติ อาห ฯ โส สาธูติ สมฺปฏิจฺฉิตฺวา มูคปกฺขชาตเก วุตฺตนเยเนว สพฺพํ สํวิทหิตฺวา อมนาปสทฺเท มิคปกฺขิโนปิ ปลาเปตฺวา เอกปทิกมคฺคํ มาเปตฺวา สกฏฺฐานเมว คโต ฯ เตปิ ตํ มคฺคํ ทิสฺวา เตน อสฺสมปทํ ปาปุณึสุ ฯ ทุกูลปณฺฑิโต ปณฺณสาลํ ปวิสิตฺวา ปพฺพชิตปริกฺขาเร ทิสฺวา สกฺเกน มยฺหํ ทินฺนนฺติ สกฺกทตฺติยภาวํ ญตฺวา สาฏกํ โอมุญฺจิตฺวา รตฺตวากจีรํ นิวาเสตฺวา เอกํ ปารุปิตฺวา อชินจมฺมํ อํเส กตฺวา ชฏามณฺฑลํ พนฺธิตฺวา อิสิเวสํ คเหตฺวา ปาริกาย ปพฺพชฺชํ อทาสิ ฯ เต อุโภปิ กามาวจรเมตฺตํ ภาเวตฺวา ตตฺถ ปฏิวสึสุ ฯ เตสํ เมตฺตานุภาเวน สพฺเพปิ มิคปกฺขิโน อญฺญมญฺญํ เมตฺตจิตฺตเมว ปฏิลภึสุ ฯ เตสุ น โกจิ กิญฺจิ วิเหเฐสิ ฯ ปาริกาปิ ปาโต วุฏฺฐาย ปานียํ ปริโภชนียํ อุปฏฺฐเปตฺวา อสฺสมปทํ สมฺมชฺชิตฺวา สพฺพกิจฺจานิ กโรติ ฯ เต อุโภปิ ผลาผลํ อาหริตฺวา ปริภุญฺชิตฺวา อตฺตโน อตฺตโน ปณฺณสาลํ ปวิสิตฺวา สมณธมฺมํ กโรนฺตา ตตฺเถว วาสํ กปฺเปสุํ ฯ