สกฺโก เตสํ อุปฏฺฐานํ อาคจฺฉติ ฯ โส เอกทิวสํ โอโลเกนฺโต อิเมสํ จกฺขูนิ ปริหายิสฺสนฺตีติ เตสํ อนฺตรายํ ทิสฺวา เทวโลกโต โอตริตฺวา ทุกูลปณฺฑิตํ อุปสงฺกมิตฺวา วนฺทิตฺวา เอกมนฺตํ นิสีทิตฺวา เอวมาห ภนฺเต ตุมฺหากํ อนฺตราโย ปญฺญายติ โว ปฏิชคฺคิตุํ ปุตฺตํ ลทฺธุํ วฏฺฏติ ๑- โลกธมฺมํ ปฏิเสวถาติ ฯ โส ตสฺส วจนํ สุตฺวา อาห สกฺก กินฺนาเมตํ กเถสิ มยํ อคารมชฺเฌ วสนฺตาปิ โลกธมฺมํ น เสวาม เอตํ โลกธมฺมํ ปหาย ปุลุวกคูถราสึ วิย ชิคุจฺฉิมฺหา อิทานิ ปน อรญฺญํ ปวิสิตฺวา อิสิปพฺพชฺชํ ปพฺพชิตฺวา กถํ เอวรูปํ กริสฺสามาติ ฯ ภนฺเต เอวรูปํ น กโรถ ปาริกาย ตาปสินิยา อุตุนีกาเล นาภึ หตฺเถน ปรามเสยฺยาถาติ อาห ฯ ทุกูลปณฺฑิโต อิทํ สกฺกา กาตุนฺติ สมฺปฏิจฺฉิ ฯ สกฺโก ตํ วนฺทิตฺวา สกฏฺฐานเมว คโต ฯ ทุกูลปณฺฑิโตปิ ปาริกาย อาจิกฺขิตฺวา ตสฺสา อุตุนีกาเล หตฺเถน นาภึ ปรามสิ ฯ ตทา โพธิสตฺโต เทวโลกโต จวิตฺวา ตสฺสา กุจฺฉิมฺหิ ปฏิสนฺธึ คณฺหิ ฯ สา ทสมาสจฺจเยน สุวณฺณวณฺณํ ปุตฺตํ วิชายิ ฯ เตเนวสฺส สุวณฺณสาโมติ นามํ กรึสุ ฯ ปาริกาย มูลผลาผลตฺถาย อรญฺญํ คตกาเล ปพฺพตนฺตเร กินฺนริโย ธาตีกิจฺจํ กรึสุ ฯ เต อุโภปิ โพธิสตฺตํ นหาเปตฺวา ปณฺสาลายํ นิปชฺชาเปตฺวา ผลาผลตฺถาย คจฺฉนฺติ ฯ ตสฺมึ ขเณ กินฺนริโย กุมารํ คเหตฺวา กนฺทราทีสุ นหาเปตฺวา ปพฺพตมตฺถกํ อารุยฺห นานาปุปฺเผหิ อลงฺกริตฺวา หริตาลมโนสิลาทีนิ สิลาตเล ฆํสิตฺวา นลาเต ติลเก กตฺวา อาเนตฺวา ปณฺณสาลายํ นิปชฺชาเปนฺติ ฯ ปาริกาปิ อาคนฺตฺวา ปุตฺตํ ถญฺญํ ปาเยติ ฯ อปรภาเค ตํ โสฬสวสฺสุทฺเทสิกํ อนุรกฺขนฺตา มาตาปิตโร ปณฺณสาลายํ นิสีทาเปตฺวา สยเมว วนมูลผลาผลตฺถาย วนํ

คจฺฉนฺติ ฯ อถ มหาสตฺโต จินฺเตสิ กทาจิ โกจิเทว เม มาตาปิตูนํ อนฺตราโย ภเวยฺยาติ เตสํ คตมคฺคํ สลฺลกฺเขสิ ฯ อเถกทิวสํ เตสํ วนมูลผลาผลํ อาทาย สายณฺหสมเย นิวตฺตนฺตานํ อสฺสมปทโต อวิทูเร สมฺปตฺตานํ มหาเมโฆ อุฏฺฐหิ ฯ เต เอกํ รุกฺขมูลํ ปวิสิตฺวา วมฺมิกมตฺถเก อฏฺฐํสุ ฯ ตสฺส จ อพฺภนฺตเร อาสีวิโส อตฺถิ ฯ เตสํ สรีรโต เสทคนฺธมิสฺสกํ อุทกํ โอตริตฺวา ตสฺส นาสปูฏํ ปาวิสิ ฯ โส กุชฺฌิตฺวา นาสวาเตน ปหริ ฯ โส เตสํ จกฺขูนิ ปาปุณิ ฯ เตน เทฺวปิ ชนา อนฺธา หุตฺวา อญฺญมญฺญํ น ปสฺสึสุ ฯ ทุกูลปณฺฑิโต ปาริกํ อามนฺเตตฺวา ปาริเก มม จกฺขูนิ ปริหีนานิ ตํ น ปสฺสามีติ อาห ฯ สาปิ ตเถว อาห ฯ เต นตฺถิ โน อิทานิ ชีวิตนฺติ มคฺคํ อปสฺสนฺตา ปริเทวมานา อฏฺฐํสุ ฯ