กึ ปน เตสํ ปุพฺพกมฺมนฺติ ฯ เต กิร ปุพฺเพ เวชฺชกุเล ชาตา อเหสุํ ฯ อถ โส เวชฺโช เอกสฺส มหทฺธนสฺส ปุริสสฺส อกฺขิโรคํ ปฏิชคฺคิ ฯ โส อกฺขีนิ ลภิตฺวา ตสฺส กิญฺจิ ธนํ น เทติ ฯ อถ เวชฺโช ตสฺส กุชฺฌิตฺวา เคหํ คนฺตฺวา อตฺตโน ภริยาย อาโรเจตฺวา ภทฺเท อหํ ตสฺส อกฺขิโรคํ ปฏิชคฺคามิ อิทานิ มยฺหํ ธนํ น เทติ กึ กโรมาติ อาห ฯ สาปิ สามิกสฺส วจนํ สุตฺวา กุชฺฌิตฺวา น โน ตสฺส สนฺตเกน ธเนนตฺโถ ตวํ เภสชฺชํ ตสฺส เอกํ โยคฺคํ ทตฺวา ตสฺส อกฺขีนิ กาณานิ กโรหีติ อาห ฯ โส สาธูติ ตสฺสา วจนํ สมฺปฏิจฺฉิตฺวา เคหโต นิกฺขมิตฺวา ตสฺส สนฺติกํ คนฺตฺวา ตถา อกาสิ ฯ โส มหทฺธโน ปุริโส น จิรสฺเสว อนฺโธ อโหสิ ฯ เต อุโภปิ อิมินา ปาปกมฺเมน จกฺขูนิ ปริหายึสุ ฯ

อถ มหาสตฺโต จินฺเตสิ มม มาตาปิตโร อญฺเญสุ ทิวเสสุ อิมาย เวลาย อาคจฺฉนฺติ อิทานิ เนสํ ปวุตฺตึ น ชานามีติ ปฏิมคฺคํ คนฺตฺวา สทฺทมกาสิ ฯ เต เทฺว ตสฺส สทฺทํ สญฺชานิตฺวา ปฏิสทฺทํ กตฺวา ปุตฺตสิเนเหน ตาต อิธ ปริปนฺโถ อตฺถิ มา อาคจฺฉาหีติ วทึสุ ฯ อถ เน มหาสตฺโต อาห เตนหิ อิมํ ยฏฺฐิโกฏึ คเหตฺวา เอถาติ ฯ โส เตสํ ทีฆยฏฺฐึ อทาสิ ฯ เต ยฏฺฐิโกฏึ คเหตฺวา ตสฺส สนฺติกํ อาคมึสุ ฯ อถ เน เกน โว การเณน จกฺขูนิ วินฏฺฐานีติ ปุจฺฉิ ฯ อถ นํ มาตาปิตโร อาหํสุ ตาต มยํ เทเว วสฺสนฺเต อิธ รุกฺขมูเล วมฺมิกมตฺถเก ฐิตา เตน การเณน อกฺขีนิ วินฏฺฐานีติ ฯ โส มาตาปิตูนํ กถํ สุตฺวาว อญฺญาสิ ตตฺถ อาสีวิเสน ภวิตพฺพํ เตน กุทฺเธน นาสวาโต วิสฏฺโฐ ภวิสฺสตีติ ฯ โส มาตาปิตโร ทิสฺวา โรทิ เจว หสิ จ ฯ อถ นํ เต ปุจฺฉึสุ กสฺมา ตาต โรทสิ เจว หสิ จาติ ฯ อมฺม ตาต ตุมฺหากํ ทหรกาเลเยว เอวํ จกฺขูนิ วินฏฺฐานีติ โรทึ อิทานิ ปน ตุมฺเห ปฏิชคฺคิตุํ ลภิสฺสามีติ หสึ อมฺมตาต ตุมฺเห มา จินฺตยิตฺถ อหํ โว ปฏิชคฺคิสฺสามีติ ฯ โส มาตาปิตโร อสฺสาเสตฺวา อสฺสมปทํ อาเนตฺวา เตสํ รตฺติฏฺฐาเน ทิวาฏฺฐาเน จงฺกมฏฺฐาเน ปณฺณสาลายํ อุจฺจารปสฺสาวฏฺฐาเน จาติ สพฺพตฺถ ฐาเนสุ รชฺชุเก พนฺธิ ฯ ตโต ปฏฺฐาย เต อสฺสมปเท ฐเปตฺวา สยเมว วนมูลผลาผลํ อาหริตฺวา ปณฺณสาลาย ฐเปตฺวา ปาโตว เตสํ วสนฏฺฐานํ สมฺมชฺชิตฺวา มาตาปิตโร วนฺทิตฺวา ฆฏํ อาทาย มิคสมฺมตนทึ คนฺตฺวา ปานียํ อาหริตฺวา ปริโภชนียํ อุปฏฺฐเปตฺวา ทนฺตกฏฺฐมุโขทกาทีนิ ทตฺวา มธุรผลาผลํ เทติ เตหิ ปริภุญฺชิตฺวา มุเข วิกฺขาลิเต สยํ เสสํ ปริภุญฺชติ ปริภุญฺชาวสาเน มาตาปิตโร วนฺทิตฺวา อาปุจฺฉิตฺวา มิคคณปริวุโต ผลาผลตฺถาย อรญฺญํ ปาวิสิ ฯ ตํ ปพฺพตปาเท กินฺนรา ปริวาเรตฺวา ผลาผลํ คเหตฺวา โพธิสตฺตสฺส อทํสุ ฯ สายณฺหสมเย อสฺสมํ อาคนฺตฺวา ฆเฏน อุทกํ อาหริตฺวา ฆฏํ ฐเปตฺวา อุทกํ ตาเปตฺวา อุณฺโหทเกน เนสํ ยถารุจึ นหาปนํ วา ปาทโธวนํ วา กตฺวา นหายิตฺวา องฺคารกปลฺลํ อุปเนตฺวา เตสํ หตฺถปาเท เสเทตฺวา เตสํ นิสินฺนานํ ผลาผลํ ทตฺวา ขาทาเปตฺวา เตสํ ปริภุญฺชนปริโยสาเน สยมฺปิ ขาทิตฺวา เสสกํ อสฺสมปเท ฐเปสิ ฯ โส อิมินา นิยาเมเนว มาตาปิตโร ปฏิชคฺคิ ฯ