ตสฺมึ สมเย พาราณสิยํ ปิลยกฺโข นาม ราชา รชฺชํ กาเรสิ ฯ โส มิคมํสโลเภน มาตรํ รชฺชํ ปฏิจฺฉาเปตฺวา สนฺนทฺธปญฺจาวุโธ หิมวนฺตํ ปวิสิตฺวา มิเค วธิตฺวา มํสํ ขาทนฺโต มิคสมฺมตนทึ ปตฺวา อนุปุพฺเพน สามสฺส ปานียคฺคหณติตฺถํ สมฺปตฺโต มิคปทวลญฺชํ ทิสฺวา มณิวณฺณาหิ สาขาหิ โกฏฺฐกํ กตฺวา ธนุํ อาโรเปตฺวา วิสปีตํ สรํ สนฺนยฺหิตฺวา ตตฺถ นิสินฺโนว อจฺฉิ ฯ มหาสตฺโตปิ สายณฺหสมเย ผลาผลํ อาหริตฺวา อสฺสมปเท ฐเปตฺวา มาตาปิตโร วนฺทิตฺวา อาปุจฺฉิตฺวา ปานียํ อาหริสฺสามีติ จินฺเตตฺวา ฆฏํ คเหตฺวา มิคคณปริวุโต เทฺวปิ มิเค เอกโต กตฺวาน เตสํ ปิฏฺฐิยํ ปานียฆฏํ ฐเปตฺวา หตฺเถน คเหตฺวา นทีติตฺถํ อคมาสิ ฯ ราชาปิ โกฏฺฐเก ฐิโตว ตํ ตถา อาคจฺฉนฺตํ ทิสฺวา มยา เอตฺตกํ กาลํ เอวํ หิมวนฺเต วิจรนฺเตนาปิ มนุสฺโส นาม น ทิฏฺฐปุพฺโพ เทโว นุโข เอส นาโค นุโข สเจ ปนาหํ เอตํ อุปสงฺกมิตฺวา ปุจฺฉิสฺสามิ เทโว เจ อากาสํ อุปฺปติสฺสติ นาโค เจ ภูมิยํ ปวิสิสฺสติ นโข ปนาหํ สพฺพกาลํ หิมวนฺเตเยว จริสฺสามิ สจาหํ พาราณสิยํ คมิสฺสามิ ตตฺราปิ มํ อมจฺจา ปุจฺฉิสฺสนฺติ อปิ นุ เต มหาราช หิมวนฺเต วสนฺเตน กิญฺจิ อจฺฉริยํ ทิฏฺฐปุพฺพนฺติ ตตฺราหํ เอวรูโป เม สตฺโต ทิฏฺฐปุพฺโพติ วตฺวา เอโส โก นามาติ วุตฺเต สเจ น ชานามีติ วกฺขามิ มํ ครหิสฺสนฺติ ตสฺมา ตํ วิชฺฌิตฺวา ทุพฺพลํ กตฺวา ปุจฺฉิสฺสามีติ จินฺเตสิ ฯ อถ เตสุ มิเคสุ ปฐมเมว โอตริตฺวา ปานียํ ปิวิตฺวา อุตฺติณฺเณสุ โพธิสตฺโต อุคฺคหิตวตฺโต วิย มหาเถโร สณิกํ สณิกํ โอตริตฺวา นหาตฺวา ปฏิปฺปสฺสทฺธทรโถ ปจฺจุตฺตริตฺวา รตฺตวากจีรํ นิวาเสตฺวา เอกํ ปารุปิตฺวา อชินจมฺมํ เอกํสํ กตฺวา ปานียฆฏํ อุกฺขิปิตฺวา อุทกํ ปุญฺฉิตฺวา วามอํสกูเฏ ฐเปสิ ฯ ตสฺมึ ปน กาเล อิทานิ วิชฺฌิตุํ สมโยติ ราชา ตํ วิสปีตํ สรํ อุกฺขิปิตฺวา มหาสตฺตสฺส ทกฺขิณปสฺเสน วิชฺฌิ ฯ สโร วามปสฺเสน นิกฺขมิ ฯ ตสฺส วิชฺฌิตภาวํ ญตฺวา มิคคณา ภีตภีตา ปลายึสุ ฯ สุวณฺณสามปณฺฑิโต ปน วิทฺโธปิ สมาโน ปานียฆฏํ ยถา วา ตถา วา อนุสุมฺภิตฺวา สตึ ปจฺจุปฏฺฐเปตฺวา สณิกํ สณิกํ โอตาเรตฺวา วาลุกํ วิยูหิตฺวา ฆฏํ ฐเปตฺวา ทิสํ ววฏฺฐเปตฺวา มาตาปิตูนํ วสนฏฺฐานทิสาภาเคน สีสํ กตฺวา รชตปฏวณฺณาย วาลุกาย สุวณฺณปฏิมา วิย นิปชฺชิตฺวา สตึ ปจฺจุปฏฺฐเปตฺวา อิมสฺมึ หิมวนฺตปฺปเทเส มม เวรี นาม นตฺถิ มม มาตาปิตูนมฺปิ เวรี นาม นตฺถีติ วตฺวา มุเขน โลหิตํ ฉฑฺเฑตฺวา ราชานํ อทิสฺวาว ปุจฺฉนฺโต ปฐมํ คาถมาห