โก นุ มํ อุสุนา วิชฺฌิ ปมตฺตํ อุทกหาริกํ

ขตฺติโย พฺราหฺมโณ เวสฺโส โก มํ วิทฺธา นิลียสีติ ฯ

ตตฺถ ปมตฺตนฺติ เมตฺตาภาวนาย อนุปฏฺฐิตสตึ ฯ อิทํ หิ โส สนฺธายาห ตสฺมึ ขเณ อตฺตานํ ปมตฺตํ นาม อกาสีติ ฯ วิทฺธาติ วิชฺฌิตฺวา เอตสฺมึ ฐาเน นิลียสีติ อตฺโถ ฯ มิคสมฺมตนทึ อุทกหาริกํ คจฺฉนฺตํ มํ อุสุนา วิสปีเตน สลฺเลน วิชฺฌิ โก นุ นาม ชโน ขตฺติโย วา พฺราหฺมโณ วา เวสฺโส วา มํ วิทฺธา วิชฺฌิตฺวา นิลียสิ วนคุมฺเพ อตฺตานํ ปฏิจฺฉาเทสิ โก นุ นาม ชโนติ ฯ

เอวญฺจ ปน วตฺวา ปุน อตฺตโน สรีรมํสสฺส อภกฺขสมฺมตภาวํ ทสฺเสตุํ ทุติยํ คาถมาห