ตตฺถ ราชาหมสฺมีติ เอวํ กิรสฺส อโหสิ เทวาปิ นาคาปิ มนุสฺสภาสาย กเถนฺติเยว อหเมตํ เทโว วา นาโค วา มนุสฺโส วาติ น ชานามิ สเจ กุชฺเฌยฺย วินาเสยฺยาปิ มํ ราชาติ วุตฺเต โกจิ ปน อภายนฺโต นาม นตฺถีติ ตสฺมา อตฺตโน ราชภาวํ ชานาเปตุํ ปฐมํ ราชาหมสฺมีติ อาห ฯ โภ มาณว อหํ กาสีนํ กาสิกรฏฺฐวาสีนํ ราชา อสฺมิ ภวามิ ฯ มนฺติ มมํ นาเมน ปิลยกฺโข ราชา ฯ วิทูติ ชานึสุ ปกฺโกสึสุ ฯ โลภาติ มิคมํสโลเภน รชฺชํ มาตุยา ปฏิจฺฉาเปตฺวา ฯ มิคเมสนฺติ มิเค เอสนฺโต คเวสนฺโต ฯ จรามหนฺติ วเน เอกโกว จรามิหํ ฯ ทุติยํ คาถํ อตฺตโน พลํ ทีเปตุกาโม อาห ฯ ตตฺถ อิสฺสฏฺเฐติ ธนุสิปฺเป ฯ ทฬฺหธมฺโมติ ทฬฺหธนุํ สหสฺสถามธนุํ โอโรเปตุญฺจ อาโรเปตุญฺจ สมตฺโถ สกลชมฺพูทีปตเล วิสฺสุโต ปากโฏ ฯ อาคโต อุสุปาตนนฺติ เม มม อุสุปาตนฏฺฐาเน อาคโต พลวนฺโต นาโค สตฺตปทมฺปิ ฐานา น มุญฺเจยฺยาติ ฯ

อิติ ราชา อตฺตโน พลํ วณฺเณตฺวา ตสฺส นามโคตฺตํ ปุตฺฉนฺโต อาห

โก วา ตวํ กสฺส วา ปุตฺโต กถํ ชาเนมุ ตํ มยํ

ปิตุโน อตฺตโน จาปิ นามโคตฺตํ ปเวทยาติ ฯ ตตฺถ ปเวทยาติ กเถยฺยาสิ ฯ