อถ เกน นุ วณฺเณน วิทฺเธยฺยํ มํ อมญฺญถาติ ฯ

ตตฺถ ภทฺทนฺเตติ สุนฺทรมุเข มหาราช อหํ เนสาทปุตฺโต อิสิปุตฺโต อสฺมิ ภวามิ ฯ ชีวนฺตนฺติ มํ อิโต ปุพฺเพ ชีวมานํ เอหิ สาม ยาหิ สามาติ โวหรนฺตา ปกฺโกสนฺตา ญาตโย สาโมติ อามนฺตยึสุ ฯ สวาชฺเชวงฺคโตติ โส อหํ อชฺช เอวํ คโต มรณมุเข สมฺปตฺโต ปวิฏฺโฐติ อตฺโถ ฯ สเยติ สยามิ ฯ สวิเสน ปุถุสลฺเลน วนจรเกน วิทฺโธ มิโค ยถา เอวมฺปิ ตถา ตยา วิทฺโธ อสฺมิ ภวามิ ฯ ปริปลุโตติ นิมฺมุคฺโค หุตฺวา เสมิ ฯ เอวรูปํ สยนฺตํ ปสฺส ปสฺสสิ ฯ ปฏิวามคตนฺติ ทกฺขิณปสฺเสน ปวิสิตฺวา วามปสฺเสน นิคฺคตนฺติ อตฺโถ ฯ ปสฺสาติ มํ โอโลกยสฺสุ ฯ ถิมฺหามีติ นิตฺถุมฺหามิ ฯ อิติ โส สตึ ปจฺจุปฏฺฐเปตฺวา อวิกมฺปมาโนว โลหิตํ มุเขน ฉฑฺเฑตฺวา อาห ฯ อาตุโรติ พาฬฺหคิลาโน หุตฺวา อหํ ตํ อนุปุจฺฉามิ ฯ นิลียสีติ เอกสฺมึ วนคุมฺเพ นิสินฺโน อจฺฉสิ ฯ วิทฺเธยฺยนฺติ วิชฺฌิตพฺพํ ฯ อมญฺญถาติ มิคสทิสํ อมญฺญิตฺถ ฯ

ราชา ตสฺส วจนํ สุตฺวา ยถาภูตํ อนาจิกฺขิตฺวา มุสาวาทํ กเถนฺโต อาห

มิโค อุปฏฺฐิโต อาสิ อาคโต อุสุปาตนํ