สมฺโมทมานา คจฺฉาม ปพฺพตานิ วนานิ จ

อถ เกน นุ วณฺเณน อุตฺราสนฺติ มิคา มมนฺติ ฯ

ตตฺถ น มํ มิคาติ มํ ทิสฺวา มิคา นาม น อุตฺราสนฺติ ฯ สาปทานีติ พาฬฺมิคา ฯ ยโต นิธินฺติ ยโต กาลโต ปฏฺฐาย อหํ วากจีรํ นิวาสนํ ปริหารึ ธาเรสึ ฯ ภีรู กึปุริสา ราชาติ มหาราช มิคา ตาว ติฏฺฐนฺตุ กึปุริสา นาม อติภีรุกา โหนฺติ ฯ เย อิมสฺมึ คนฺธมาทเน นาม ปพฺพเต วิหรนฺติ เตปิ มํ ทิสฺวา น อุตฺราสนฺติ อถ โข มยํ อญฺญมญฺญํ ปพฺพตานิ ปพฺพเตสุ วนานิ วเนสุ สมฺโมทมานา คจฺฉาม ฯ อุตฺราสนฺติ มิคา มมนฺติ มมํ ทิสฺวา มิคา อุตฺราเสยฺยุํ เกน การเณน ตฺวํ มํ สทฺทหาเปสฺสสีติ ทีเปติ ฯ ตํ สุตฺวา ราชา มยา อิมํ สุวณฺณสามํ นิรปราธํ วิชฺฌิตฺวา มุสาวาโท กถิโต สจฺจเมว กเถสสามีติ จินฺเตตฺวา อาห ฯ

น ตทฺทส มิโค สาม กินฺตาหํ อลิกํ ภเณ