@เวทิตพฺพํ ฯ

ตตฺถ อาสินฺติ อหํ เอตฺตกํ กาลํ อชฺชรามโรมฺหีติ สญฺญี อโหสึ ฯ อชฺเชตนฺติ อชฺช อหํ อิมํ สามํ กาลกตํ ทิสฺวา มมญฺเจว อญฺเญสญฺจ สตฺตานํ ชรามรณํ ชานามิ ฯ นตฺถิ มจฺจุสฺส นาคโมติ ตํ มจฺจุโน อาคมนํ อชฺช ชานามิ อิโต ปุพฺเพ น ชานามีติ วิลปติ ฯ สฺวาชฺเชวงฺคเต กาเลติ โย สาโม สวิเสน สลฺเลน สมปฺปิโต อิทาเนว มํ ปฏิมนฺเตติ โส อชฺช เอวํ คเต มรณกาเล ปวตฺเต กิญฺจิ อปฺปมตฺตกมฺปิ น ภาสตีติ ทีเปติ ฯ ตทา หีติ ตสฺมึ ขเณ สามํ วิชฺฌนฺเตน มยา ปาปํ กตํ ฯ จิรํ รตฺตาย กิพฺพิสนฺติ ตํ ปน จิรํ รตฺตาย วิปจฺจนสมตฺถํ ทารุณํ ผรุสํ ฯ ตสฺสาติ ตสฺส มม เอวรูปํ ปาปกมฺมํ กตฺวา วิจรนฺตสฺส ฯ วตฺตาโรติ นินฺทิตาโร ภวนฺติ ฯ กุหึ ฯ คาเม ฯ กินฺติ ฯ กิพฺพิสการโกติ ฯ อิมสฺมึ ปน อรญฺเญ นิมฺมนุสฺสมฺหิ โก มํ วตฺตุมรหติ สเจ หิ ภเวยฺย มํ วเทยฺยาติ วิลปติ ฯ สารยนฺตีติ คาเมสุ นิคมาทีสุ วา ฯ สํคจฺฉ มาณวาติ ตตฺถ ตตฺถ ปุริสา สนฺนิปติตฺวา อมฺโภ ปุริสฆาตก ทารุณํ เต กมฺมํ กตํ อสุกทณฺฑปฺปตฺโต นาม ตฺวนฺติ เอวํ กมฺมานิ สาเรนฺติ โจเทนฺติ อิมสฺมึ ปน อรญฺเญ นิมฺมนุสฺเส อิมํ ราชานํ โก สารยิสฺสตีติ เอวํ อตฺตานํ โจเทนฺโต วิลปติ ฯ

ตทา พสุนฺธรี นาม เทวธีตา คนฺธมาทนวาสินี มหาสตฺตสฺส สตฺตเม อตฺตภาเว มาตา ภูตปุพฺพา หุตฺวา ปุตฺตสิเนเหน นิจฺจํ โพธิสตฺตํ อาวชฺเชติ ฯ ตํ ทิวสํ ปน สา ทิพฺพสมฺปตฺตึ อนุภวมานา น ตํ อาวชฺเชติ ฯ เทวสมาคมํ คตาติปิ วทนฺติ ฯ สา ตสฺส วิสญฺญีภูตกาเล กินฺนุโข เม ปุตฺตสฺส ปวตฺตีติ อาวชฺชมานา อทฺทส อยํ ปิลยกฺโข นาม ราชา สวิเสน สลฺเลน มม ปุตฺตํ วิชฺฌิตฺวา มิคสมฺมตนทีตีเร วาลุกาปุลิเน ปาเตตฺวา มหนฺเตน สทฺเทน ปริเทวิ สจาหํ ตตฺถ น คมิสฺสามิ มม ปุตฺโต สุวณฺณสาโม เอตฺถ วินสฺสิสฺสติ รญฺโญปิ หทยํ ผลิสฺสติ สามสฺส มาตาปิตโร นิราหารา ปานียํปิ อลภนฺตา สุสฺสิตา มริสฺสนฺติ มยิ ปน คตาย ราชา ปานียฆฏํ อาทาย ตสฺส มาตาปิตูนํ สนฺติกํ คมิสฺสติ คนฺตฺวา จ ปน โว ปุตฺโต มยา หโตติ กเถสฺสติ เอวญฺจ เตสํ วจนํ สุตฺวา เต ปุตฺตสฺส สนฺติกํ อาเนสฺสติ อถ เต จ อหญฺจ สจฺจกิริยํ กริสฺสามิ สามสฺส วิสํ วินสฺสติ เอวํ เม ปุตฺโต ชีวิตํ ลภิสฺสติ มาตาปิตโรปิสฺส จกฺขูนิ ลภิสฺสนฺติ ราชา จ สามสฺส ธมฺมเทสนํ สุตฺวา นครํ คนฺตฺวา มหาทานํ ทตฺวา ธมฺเมน รชฺชํ กาเรตฺวา สคฺคปารายโน ภวิสฺสติ ตสฺมา คจฺฉามหํ ตตฺถาติ ฯ สา คนฺตฺวา มิคสมฺมตนทีตีเร อทิสฺสมาเนน กาเยน อากาเส ฐตฺวา รญฺญา สทฺธึ กเถสิ ฯ