ธมฺมํ เนสาท ภณถ กตา อปจิตา ตยา

ปิตา ตฺวมสิ อมฺหากํ มาตา ตฺวมสิ ปาริเกติ ฯ

ตตฺถ ตยาติ เอเกกํ วทนฺโต เอวมาห ฯ ปิตาติ ตาต ทุกูลปณฺฑิต อชฺชโต ปฏฺฐาย ตฺวํ มยฺหํ ปิตุฏฺฐาเน ติฏฺฐ อมฺม ปาริเก ตฺวํปิ เม มาตุฏฺฐาเน ติฏฺฐ อหํ ปน โว ปุตฺตสฺส สามสฺส ฐาเน ฐตฺวา ปาทโธวนาทีนิ สพฺพกิจฺจานิ กริสฺสามิ มํ ราชาติ อสลฺลกฺเขตฺวา สาโม วิย สลฺลกฺเขถาติ ฯ

เต อญฺชลึ ปคฺคยฺห วนฺทิตฺวา มหาราช อมฺหากํ ตว กมฺมกรณกิจฺจํ นตฺถิ อปิจ โข ปน มหาราช โน ยฏฺฐิโกฏึ คเหตฺวา เนตฺวา สามํ ทสฺเสหีติ ยาจนฺตา คาถาทฺวยมาหํสุ