ธมฺมญฺจร มหาราช อินฺทา เทวา สพฺรหฺมกา

สุจิณฺเณน ทิวํ ปตฺตา มา ธมฺมํ ราช ปามโทติ ฯ

ตาสํ ปน คาถานํ อตฺโถ สกุณชาตเก วิตฺถาริโตว โหติ ฯ

เอวํ มหาสตฺโต รญฺโญ ธมฺมํ เทเสตฺวา อุตฺตรึปิ โอวทนฺโต ปญฺจ สีลานิ อทาสิ ฯ ราชา ตสฺส โอวาทํ สิรสา สมฺปฏิจฺฉิตฺวา โพธิสตฺตํ วนฺทิตฺวา ขมาเปตฺวา พาราณสึ คนฺตฺวา ทานาทีนิ ปุญฺญานิ กตฺวา ปญฺจ สีลานิ รกฺขิตฺวา ธมฺเมน สเมน รชฺชํ กาเรนฺโต อายุหปริโยสาเน สคฺคปรายโน อโหสิ ฯ โพธิสตฺโตปิ มาตาปิตโร ปริจริตฺวา มาตาปิตูหิ สทฺธึ อภิญฺญา จ สมาปตฺติโย จ นิพฺพตฺเตตฺวา อปริหีนชฺฌาโน อายุหปริโยสาเน เตเหว สทฺธึ พฺรหฺมโลกุปโค อโหสิ ฯ