มหานิปาต วณฺณนา

เนมิราชชาตกํ

อจฺเฉรํ วต โลกสฺมินฺติ อิทํ สตฺถา มิถิลํ อุปนิสฺสาย มฆเทวสฺส อมฺพวเน วิหรนฺโต สิตปาตุกมฺมํ อารพฺภ กเถสิ ฯ เอกทิวสมฺหิ สตฺถา สายณฺหสมเย สมฺพหุเลหิ ภิกฺขูหิ สทฺธึ ตสฺมึ อมฺพวเน จาริกญฺจรมาโน เอกํ รมฺมณียํ ภูมิปฺปเทสํ ทิสฺวา อตฺตโน ปุพฺพจริยํ กเถตุกาโม หุตฺวา สิตปาตุกมฺมํ กตฺวา อายสฺมตา อานนฺทตฺเถเรน สิตการณํ ปุฏฺโฐ อานนฺท อยํ ภูมิปฺปเทโส ปุพฺเพ มยา มฆเทวราชกาเล ฌานกีฬํ กีฬนฺเตน อชฺฌาวุฏฺฐปุพฺโพติ วตฺวา ตุณฺหี อโหสิ เตหิ ยาจิโต ปญฺญตฺตปวรพุทฺธาสเน นิสีทิตฺวา อตีตํ อาหริ ฯ

อตีเต ภิกฺขเว วิเทหรฏฺเฐ มิถิลนคเร มฆเทโว นาม ราชา อโหสิ ฯ โส จตุราสีติวสฺสสหสฺสานิ กุมารกีฬํ กีฬิ ฯ จตุราสีติวสฺสสหสฺสานิ อุปรชฺชํ กาเรสิ ฯ จตุราสีติวสฺสสหสฺสานิ รชฺชํ กาเรนฺโต ยทา เม สมฺม กปฺปก สิรสฺมึ ปลิตานิ ปสฺเสยฺยาสิ ตทา เม อาโรเจยฺยาสีติ อาห ฯ อปรภาเค กปฺปโก ปลิตานิ ทิสฺวา รญฺโญ อาโรเจสิ ฯ โส สุวณฺณสณฺฑาเสน อุทฺธราเปตฺวา หตฺเถ ปติฏฺฐาเปตฺวา ปลิตํ โอโลเกตฺวา อาคนฺตฺวา นลาตนฺเต ลคฺคํ วิย มรณํ สมฺปสฺสมาโน อิทานิ เม ปพฺพชิตกาโลติ กปฺปกสฺส คามวรํ ทตฺวา เชฏฺฐปุตฺตํ ปกฺโกสาเปตฺวา ตาต รชฺชํ สมฺปฏิจฺฉ อหํ ปพฺพชิสฺสามีติ วตฺวา กึ การณา เทวาติ วุตฺเต ราชปุตฺตสฺส การณํ อาจิกฺขนฺโต อิมํ คาถมาห