อุตฺตมงฺครุหา มยฺหํ อิเม ชาตา วโยหรา

ปาตุภูตา เทวทูตา ปพฺพชฺชาสมโย มมนฺติ ฯ

วตฺวา ปุตฺตํ รชฺเช อภิสิญฺจิตฺวา ตวํปิ เอวรูปํ ปลิตํ ทิสฺวาว ปพฺพเชยฺยาสีติ โอวทิตฺวา นครา นิกฺขมิตฺวา อิสิปพฺพชฺชํ ปพฺพชิตฺวา จตุราสีติวสฺสสหสฺสานิ จตฺตาโร พฺรหฺมวิหาเร ภาเวตฺวา พฺรหฺมโลเก นิพฺพตฺติ ฯ ปุตฺโตปิสฺส เตเนว อุปาเยน ปพฺพชิตฺวา พฺรหฺโลกปรายโน อโหสิ ฯ ตถา ตสฺส ปุตฺโต ตถา ตสฺส ปุตฺโตติ เอวํ ทวีหิ อูนานิ จตุราสีติ ขตฺติยสหสฺสานิ สีเส ปลิตํ ทิสฺวา อิมสฺมึ อมฺพวเน ปพฺพชิตฺวา จตฺตาโร พฺรหฺมวิหาเร ภาเวตฺวา พฺรหฺมโลเก นิพฺพตฺตึสุ ฯ เตสํ สพฺพปฐมํ นิพฺพตฺโต มฆเทโว นาม ราชา พฺรหฺมโลเก ฐิโตว อตฺตโน วํสํ โอโลเกนฺโต ทวีหิ อูนานิ จตุราสีติ ขตฺติยสหสฺสานิ ปพฺพชิตานิ ทิสฺวา ตุฏฺฐมานโส หุตฺวา อิโต นุโข ปรํ ปวตฺติสฺสติ น ปวตฺติสฺสตีติ วํสํ โอโลเกนฺโตว อปฺปวตฺตนภาวํ ญตฺวา มม วํสํ อหเมว ฆเฏสฺสามีติ จินฺเตตฺวา ตโต จวิตฺวา มิถิลนคเร รญฺโญ อคฺคมเหสิยา กุจฺฉิมฺหิ ปฏิสนฺธึ คณฺหิตฺวา ทสมาสจฺจเยน มาตุกุจฺฉิโต นิกฺขมิ ฯ ราชา ตสฺส นามคฺคหณทิวเส เนมิตฺตเก พฺราหฺมเณ ปกฺโกสาเปตฺวา ปุจฺฉิ ฯ ลกฺขณานิ โอโลเกตฺวา มหาราช อยํ กุมาโร ตุมฺหากํ วํสํ ฆเฏนฺโต อุปฺปนฺโน ตุมฺหากํ วํโส หิ ปพฺพชิตวํโส อิมสฺส กุมารสฺส ปุรโต เนว คมิสฺสตีติ วทึสุ ฯ ตํ สุตฺวา ราชา อยํ รถจกฺกเนมิ วิย มม วํสํ ฆเฏนฺโต ชาโต ตสฺมา ตสฺส เนมิกุมาโรติ นามํ กาเรสฺสามีติ เนมิกุมาโรติสฺส นามํ อกาสิ ฯ โส ทหรกาลโต ปฏฺฐาย ทาเน จ สีเล จ อุโปสถกมฺเม จ อภิรโต อโหสิ ฯ อถสฺส ปิตา ปุริมนเยเนว สีเส ปลิตํ ทิสฺวา กปฺปกสฺส คามวรํ ทตฺวา ปุตฺตสฺส รชฺชํ นิยฺยาเทตฺวา ตสฺมึเยว อมฺพวเน ปพฺพชิตฺวา พฺรหฺมโลกปรายโน อโหสิ ฯ เนมิราชา ปน ทานชฺฌาสยตาย จตูสุ นครทฺวาเรสุ นครมชฺเฌ จาติ ปญฺจ ทานสาลาโย กาเรตฺวา มหาทานํ ปวตฺเตสิ ฯ เอเกกาย ทานสาลาย สตสหสฺสํ ทตฺวา เทวสิกํ เทวสิกํ ปญฺจ ปญฺจ กหาปณสตสหสฺสานิ ธนานิ ปริจฺจชิ นิจฺจํ ปญฺจ สีลานิ รกฺขติ ปกฺขทิวเสสุ อุโปสถํ สมาทยิ มหาชนมฺปิ ทานาทีสุ ปุญฺเญสุ สมาทเปสิ สคฺคมคฺคํ อาจิกฺขิ นิรยภเยน มหาชเน ตชฺเชตฺวา ธมฺมํ เทเสสิ ฯ ตสฺโสวาเท ฐตฺวา ทานาทีนิ ปุญฺญานิ กตฺวา ตโต จุตา เทวโลเก นิพฺพตฺตึสุ ฯ เทวโลโก ปริปูริ ฯ นิรโย ตุจฺโฉ วิย อโหสิ ฯ ตทา ตาวตึสภวเน เทวสํฆา สุธมฺมาย เทวสภายํ สนฺนิปติตฺวา อโห วต อมฺหากํ อาจริโย เนมิราชา ตํ นิสฺสาย มยํ อิมํ พุทฺธญาเณนาปิ อปริจฺฉินฺทิยํ ทิพฺพสมฺปตฺตึ อนุภวามาติ วตฺวา มหาสตฺตสฺส คุเณ วณฺณยึสุ ฯ มนุสฺสโลเกปิสฺส วณฺณยึสุ มหาสมุทฺทปิฏฺเฐ อาสิตฺตเตลํ วิย คุณกถา ปตฺถริ ฯ