อิติ โส เทวราชา อปริหาเปตฺวา รญฺโญ วณฺณํ กเถสิ ฯ

ตํ สุตฺวา เทวคณา ราชานํ ทฏฺฐุกามา หุตฺวา มหาราช อมฺหากํ เนมิราชา อาจริโย ตสฺโสวาเท ฐตฺวา ตํ นิสฺสาย อมฺเหหิ อยํ ทิพฺพสมฺปตฺติ ลทฺธา ตํ ทฏฺฐุกามมฺหา ตํ ปกฺโกสาเปหิ มหาราชาติ วทึสุ ฯ สกฺโก สาธูติ สมฺปฏิจฺฉิตฺวา มาตลึ ปกฺโกสาเปตฺวา สมฺม มาตลิ เวชยนฺตรถํ โยเชตฺวา มิถิลนครํ คนฺตฺวา เนมิราชานํ ทิพฺพยาเน อาโรเปตฺวา อิธาเนหีติ อาห ฯ โส สาธูติ สมฺปฏิจฺฉิตฺวา รถํ โยเชตฺวา ปายาสิ ฯ สกฺกสฺส ปน เทเวหิ สทฺธึ กเถนฺตสฺส จ มาตลึ ปกฺโกสาเปตฺวา อาณาเปนฺตสฺส จ มาตลิสฺส รถํ โยเชนฺตสฺส จ มนุสฺสคณนาย มาโส อติกฺกนฺโต ฯ อิติ เนมิรญฺโญ ปุณฺณมายํ อุโปสถิกสฺส ปาจีนสีหปญฺชรํ วิวริตฺวา มหาตเล นิสีทิตฺวา อมจฺจคณปริวุตสฺส สีลํ ปจฺจเวกฺขนฺตสฺส ปาจีนโลกธาตุโต อุคฺคจฺฉนฺเตน จนฺทมณฺฑเลน สทฺธึเยว โส รโถ ปญฺญายิ ฯ มนุสฺสา ภุตฺตสายมาสา อตฺตโน อตฺตโน ฆรทฺวาเรสุ นิสีทิตฺวา สุขกถํ กเถนฺตา อชฺช เทฺว จนฺทา อุคฺคตาติ อาหํสุ ฯ อถ เนสํ สลฺลปนฺตานญฺเญว โส รโถ ปากโฏ อโหสิ ฯ มหาชโน นายํ จนฺโท รโถติ วตฺวา ตสฺมึ ขเณ อนุกฺกเมน สินฺธวสหสฺสยุตฺเต มาตลิสงฺคาหเก เวชยนฺตเรเถ ปากเฏ ชาเต กสฺส นุโข อิทํ ทิพฺพยานํ อาคจฺฉตีติ จินฺเตตฺวา น กสฺสจิ อญฺญสฺส อมฺหากํ ราชา ธมฺมิโก ตสฺเสว สกฺเกน เวชยนฺตรโถ เปสิโต ภวิสฺสติ อมฺหากํเยว รญฺโญ อนุจฺฉวิโกติ ตุฏฺฐหฏฺโฐ คาถมาห

อพฺภูโต วต โลกสฺมึ อุปฺปชฺชิ โลมหํสโน

ทิพฺโพ รโถ ปาตุรหุ เวเทหสฺส ยสสฺสิโนติ ฯ