กุฏฺฐิตํ ขารสํยุตฺตํ ตตฺตํ อคฺคิสิขูปมนฺติ ฯ

ตตฺถ เวตรณินฺติ ภิกฺขเว มาตลิ รญฺโญ กถํ สุตฺวา นิรยาภิมุขํ รถํ เปเสตฺวา ปฐมํ กมฺมปจฺจเยน อุตุนา สมุฏฺฐิตํ เวตรณึ นทึ ทสฺเสสิ ฯ ตตฺถ นิรยปาลา ชลิตานิ อสิสตฺติโตมรภินฺทิวาลมุคฺคราทีนิ อาวุธานิ คเหตฺวา เนรยิกสตฺเต ปหรนฺติ วิชฺฌนฺติ โปเถนฺติ ฯ เต ตํ ทุกฺขํ อสหนฺตา เวตรณิยํ ปตนฺติ ฯ

สา นที อุปริชลิตาหิ ภินฺทิวาลปฺปมาณาหิ สกณฺฏกาหิ เวตฺตลตาหิ สญฺฉนฺนา ฯ เต ตตฺถ พหูนิ วสฺสสหสฺสานิ ติฏฺฐนฺตา ปชฺชลิเตสุ ขุรธาราติกฺขิเณสุ กณฺฏเกสุ ขณฺฑาขณฺฑิกา โหนฺติ ฯ เตสํ เหฏฺฐา ตาลปฺปมาณานิ ชลิตอยสูลานิ อุฏฺฐหนฺติ ฯ เนรยิกสตฺตา พหุอทฺธานํ วีตินาเมตฺวา เวตฺตลตาหิ คลิตฺวา สูเลสุ ปติตฺวา วิทฺธสรีรา สูเลสุ อาวุณิตมจฺฉา วิย จิรํ ปจนฺติ ฯ สูลานิ ปชฺชลิตานิ ขุรธาราติกฺขิณานิ อยโปกฺขรปตฺตานิ สนฺติ ฯ เต สูเลหิ คลิตฺวา อยโปกฺขรปตฺเตสุ ปติตฺวา จิรํ ทุกฺขเวทนํ อนุภวนฺติ ฯ ตโต ขารุทเก ปตนฺติ อุทกํปิ ชลติ เนรยิกสตฺตาปิ ชลนฺติ ธูมาปิ อุฏฺฐหนฺติ อุทกสฺส ปน เหฏฺฐา นทีตลํ ขุรธาราหิ สญฺฉนฺนํ ฯ เต เหฏฺฐา นุโข กีทิสนฺติ อุทเก นิมุชฺชิตฺวา ขุรธาราสุ ขณฺฑาขณฺฑิกา โหนฺติ เต ตํ มหาทุกฺขํ อธิวาเสตุํ อสกฺโกนฺตา มหนฺตํ ภยเภรวํ รวนฺตา วิจรนฺติ ฯ กทาจิ อนุโสตํ วุยฺหนฺติ กทาจิ ปฏิโสตํ ฯ อถ เต ตีเร ฐิตา นิรยปาลา อุสุสตฺติโตมรภินฺทิวาลานิ ขิปิตฺวา เต มจฺเฉ วิย วิชฺฌนฺติ ฯ เต ทุกฺขเวทนปฺปตฺตา มหาวิรวํ วิรวนฺติ ฯ อถ เต ชลิเตหิ อยพลิเสหิ อุทฺธริตฺวา อากฑฺฒิตฺวา ปชฺชลิตอยปฐวิยํ นิปชฺชาเปตฺวา มุเข ตตฺตํ อโยคุฬํ ปกฺขิปนฺติ ฯ

อิติ ราชา เวตรณิยํ มหาทุกฺขปีฬิเต สตฺเต ทิสฺวา ภีตตสิโต หุตฺวา กินฺนาม อิเม สตฺตา ปาปกมฺมํ อกํสูติ มาตลึ ปุจฺฉิ ฯ โสปิสฺส พฺยากาสิ ฯ