เต เหฐยิตฺวา สกุณํ ชนินฺท

เต ลุทฺทกมฺมา ปสเวตฺว ปาปํ

เตเม ชนา ลุตฺตสิรา สยนฺตีติ ฯ

ตตฺถ ลุญฺจนฺตีติ อุปฺปาเฏนฺติ ฯ อถ เวฐยิตฺวาติ ชลิตโลหโยตฺเตหิ คีวํ เวเฐตฺวา อโธมุขํ กตฺวา ฯ อุโณฺหทกสฺมินฺติ กปฺเปน สณฺฐิตโลหอุทกสฺมึ ฯ ปกิเลทยิตฺวาติ เตเมตฺวา ขิปิตฺวา ฯ อิทํ วุตฺตํ โหติ สมฺม มาตลิ เยสํ อิเม นิรยปาลา ชลิตอยโยตฺเตหิ คีวํ เวเฐตฺวา ติคาวุตปฺปมาณํ สรีรํ โอนาเมตฺวา ตํ คีวํ สมฺปริวตฺตกํ ลุญฺจิตฺวา ชลิตอยทณฺฑเกหิ อาทาย เอกสฺมึ ชลิตโลหรเส ปกฺขิปิตฺวา ตุฏฺฐหฏฺฐา โหนฺติ ตาย จ คีวาย ลุญฺจิตาย อิตรา เตสํ ปุน สีเสน สทฺธึ คีวา อุปฺปชฺชติเยว กินฺนาเมเต กมฺมํ กรึสุ เอเตหิ เม ทิสฺวา ภยํ อุปฺปชฺชตีติ ฯ ปกฺขี คเหตฺวาน วิเหฐยนฺตีติ มหาราช เย ชีวโลกสฺมึ สกุเณ คเหตฺวา ปกฺเข ลุญฺจิตฺวา คีวํ เวเฐตฺวา ชีวิตกฺขยํ ปาเปตฺวา ขาทนฺติ วา วิกฺกีณนฺติ วา เต อิเม ชนา อิธ ลุตฺตสิรา สยนฺตีติ ฯ