เต ลุทฺทกมฺมา ปสเวตฺวา ปาปํ

เตเม ชนา วิลกตา สยนฺตีติ ฯ

ตตฺถ คีวาย พนฺธาติ มหนฺเตหิ ชลิตอยโยตฺเตหิ คีวายํ พนฺธิตฺวา อากฑฺฒิตฺวา อยปฐวิยํ ปาเตตฺวา ชลิเตหิ นานาวุเธหิ โกฏฺฏิยมานา เต ราชา ทิสฺวา ปุจฺฉติ ฯ อญฺเญ วิกนฺตาติ อญฺเญ ปน ขนฺฑาขนฺฑิกํ สญฺฉินฺนา ฯ วิลกตาติ อญฺเญ ชลิเตสุ อยผลเกสุ ฐเปตฺวา มํสํ วิย โปตฺถนิยา โกฏฺเฏตฺวา ปุญฺชาปุญฺชกตา หุตฺวา สยนฺติ ฯ มจฺฉิกาติ มจฺฉฆาตกา ฯ ปสุนฺติ คาวึ ฯ สูเณสุ ปสารยึสูติ มํสํ วิกฺกีณิตฺวา ชีวิตกปฺปนตฺถาย สูณาปเณสุ ฐเปสุํ ฯ

มาตลิ ปุรโต รถํ เปเสตฺวา อปรํ ทสฺเสสิ ฯ อิเม เนรยิกสตฺเต มุตฺตกรึสภกฺเข ทิสฺวา ราชา มาตลึ ปุจฺฉนฺโต คาถมาห