เต ปาปทิฏฺฐี ปสเวตฺว ปาปํ

เตเม ชนา อธิมตฺตา ทุกฺขา ติปฺปา

ขรา กฏุกา เวทนา เวทยนฺติ ฯ

ตตฺถ อุจฺจาวจาเมติ อุจาวจา อิเม ขุทฺทกา จ มหนฺตา จาติอตฺโถ ฯ อุปกฺกมาติ การณปฺปโยคา ฯ สุปาปทิฏฺฐิโนติ นตฺถิ ทินฺนํ นตฺถิ ยิฏฺฐํ นตฺถิ หุตํ นตฺถิ สุกฏทุกฺกฏานํ กมฺมานํ ผลวิปาโก นตฺถิ มาตา นตฺถิ ปิตา นตฺถิปิ สมณพฺรหฺมณา นตฺถิ สตฺตา โอปปาติกา นตฺถิ อยํ โลโก นตฺถิ ปรโลโกติ ทสวตฺถุกาย มิจฺฉาทิฏฺฐิยา สุฏฺฐุ ปาปธมฺมิโน ฯ วิสฺสาสกมฺมานีติ ตาย มิจฺฉาทิฏฺฐิยา วิสฺสาเสน กตกมฺมนิสฺสิตา หุตฺวา นานาวิธานิ ปาปกมฺมานิ กโรนฺติ ฯ เตเมติ เต อิเม ชนา เอวรูปํ ทุกฺขํ อนุภวนฺติ ฯ