เอวํ มาตลิ รญฺโญ มิจฺฉาทิฏฺฐิกานํ ปจนนิรยํ อาจิกฺขิ ฯ

เทวโลเกปิ เทวคณา รญฺโญ อาคมนํ โอโลกิยมานา สุธมฺมาย เทวสภายเมว นิสีทึสุเยว ฯ สกฺโกปิ กึ นุโข มาตลิ อติจิรายตีติ อุปธาเรนฺโต ตํ การณํ ญตฺวา มาตลิ อตฺตโน ทูตวิเสสํ ทสฺเสตุํ มหาราช อสุกกมฺมํ กตฺวา อสุกนิรเย นาม นิพฺพตฺตาติ นิรเย ทสฺเสนฺโต วิจรติ เนมิรญฺโญ ปน อปฺปเมว อายุ ขีเยถ นิรยทสฺสนสฺส ปริยนฺตํ นํ น คจฺเฉยฺยาติ จินฺเตตฺวา เอกํ มหาชวนํ เทวปุตฺตํ เปเสสิ สีฆํ ราชานํ คเหตฺวา อาคจฺฉตูติ มาตลิสฺส วเทหีติ ฯ โส ชเวนาคนฺตฺวา อาโรเจสิ ฯ มาตลิ ตสฺส วจนํ สุตฺวา มหาราช น สกฺกา จิรายิตุนฺติ รญฺเญ เอกปฺปหาเรเนว จตูสุ ทิสาสุ พหุนิรเย ทสฺเสตฺวา คาถมาห

วิทิตานิ เต มหาราช อาวาสํ ปาปกมฺมินํ

ฐานานิ ลุทฺทกมฺมานํ ทุสฺสีลานญฺจ ยา คติ