อุโปสถํ อุปวสิ สทา สีเลสุ สํวุโต

สญฺญโม สํวิภาโค จ โส วิมานสฺมิ โมทตีติ ฯ

ตตฺถ นชฺโชติ เอกา นที ตํ วิมานํ ปริกฺขิปิตฺวา คตาติ อตฺโถ ฯ ทุมายุตาติ สา นที นานาปุปฺเผหิ ทุเมหิ อายุตฺตา ฯ มิถิลายนฺติ เอส มหาราช กสฺสปพุทฺธกาเล วิเทหรฏฺเฐ มิถิลนคเร เอโก คหปติ ทานปติ อโหสิ ฯ โส เอตานิ ปุญฺญกมฺมานิ กตฺวา อิมํ ทิพฺพสมฺปตฺตึ ปตฺโตติ ฯ

เอวมสฺส เตนาปิ กตกมฺมํ อาจิกฺขิตฺวา ปุรโต รถํ เปเสตฺวา ปุริมสทิสเมว อปรํ เวฬุริยวิมานํ ทสฺเสสิ ฯ ราชา ตตฺถ ทิพฺพสมฺปตฺตึ อนุภวนฺตสฺส เทวปุตฺตสฺส กตกมฺมํ ปุจฺฉิ ฯ อิตโรปิสฺส อาจิกฺขิ ฯ