อเนกรูปํ รุจิรํ นานาจิตฺตํ ปกาสติ

อากิณฺณํ อินฺทสทิเสหิ พฺยคฺเฆเหว สุรกฺขิตํ

ปวิเสเตน ราชิสิ อรุชํ ภูมิ ปกฺกมาติ ฯ

ตตฺถ อเนกรูปนฺติ อเนกชาติกํ ฯ นานาจิตฺตนฺติ นานารตนจิตฺรํ ฯ ปกาสตีติ กินฺนาเมตํ ปญฺญายติ ฯ อากิณฺณนฺติ สมฺปริวาริตํ ฯ พฺยคฺเฆเหว สุรกฺขิตนฺติ ยถา นาม พฺยคฺเฆหิ วา สีเหหิ วา มหาวนํ สุรกฺขิตํ เอวํ อินฺทสทิเสเหว สุรกฺขิตํ ตาสํ ปน อินฺทปฏิมานํ อารกฺขนตฺถาย ฐปิตภาโว เอกนิปาเต กุลาวกชาตเก กเถตพฺโพ ฯ กิมภญฺญมาหูติ กึ นามํ วทนฺติ ฯ ปเวสนนฺติ นิกฺขมนปเวสนตฺถาย สุนิมฺมิตํ ฯ สุทสฺสนสฺสาติ โสภนทสฺสนสฺส สิเนรุคิริโน ฯ ทฺวารํ เหตนฺติ เอตํ สเนรุมตฺถเก ปติฏฺฐิตสฺส ทสสหสฺสโยชนิกสฺส เทวนครสฺส ทฺวารํ ฯ ปกาสตีติ ทฺวารโกฏฺฐโก ปญฺญายตีติ อตฺโถ ฯ ปวิเสเตนาติ เอเตน ทฺวาเรน นครํ ปวิส ฯ อรุชํ ภูมิ ปกฺกมาติ อโรคํ สุวณฺณํ รชตมณิมยํ นานาปุปฺผสมากิณฺณํ ทิพฺพภูมึ ทิพฺพยาเนน อกฺกม มหาราชาติ ฯ