พหูปกาโร โน ภวํ มาตลิ เทวสารถิ

โย เม กลฺยาณกมฺมานํ ปาปานํ ปฏิทสฺสยีติ ฯ

ตตฺถ โย เม กลฺยาณกมฺมานํ ปาปานํ ปฏิทสฺสยีติ โย เอส มยฺหํ กลฺยาณกมฺมานํ เทวานญฺจ วสนฏฺฐานานิ ปาปกมฺมานํ เนรยิกานญฺจ ฐานานิ ทสฺเสสีติ อตฺโถ ฯ

อตฺถ ราชา สกฺกํ เทวราชานํ อามนฺเตตฺวา อิจฺฉามหํ มหาราช มนุสฺสโลกํ คนฺตุนฺติ อาห ฯ สกฺโก เตน หิ สมฺม มาตลิ เนมิราชานํ ปุน ตตฺเถว มิถิลนคเร เนหีติ อาห ฯ โส สาธูติ สมฺปฏิจฺฉิตฺวา รถํ อุปฏฺฐเปสิ ฯ ราชา เทวคเณหิ สทฺธึ สมฺโมทิตฺวา เทเว นิวตฺเตตฺวา อาปุจฺฉิตฺวา รถมาภิรูหิ ฯ มาตลิ รถํ เปเสนฺโต ปาจีนทิสาภาเคน มิถิลํ สมฺปาปุณิ ฯ มหาชโน ทิพฺพรถํ ทิสฺวา ราชาโน อาคจฺฉตีติ ปมุทิตจิตฺโต อโหสิ ฯ มาตลิ มิถิลนครํ ปทกฺขิณํ กตฺวา ตสฺมึเยว สีหปญฺชเร มหาสตฺตํ โอตาเรตฺวา คจฺฉามหํ มหาราชาติ อาปุจฺฉิตฺวา สกฏฺฐานเมว คโต ฯ มหาชโนปิ ราชานํ ปริวาเรตฺวา กีทิโส เทวโลโก มหาราชาติ ปุจฺฉิ ฯ ราชา เทวานญฺจ สกฺกสฺส จ เทวรญฺโญ สมฺปตฺตึ วณฺเณตฺวา ตุมฺเหปิ ทานาทีนิ ปุญฺญานิ กโรถ เอวํ ตสฺมึ เทวโลเก นิพฺพตฺติสฺสถาติ มหาชนสฺส ธมฺมํ เทเสสิ ฯ โส อปรภาเค กปฺปเกน ปลิตสฺส ชาตภาเว อาโรจิเต สุวณฺณสณฺฑาเสน ปลิตํ อุทฺธราเปตฺวา หตฺเถ ฐเปตฺวา ตํ ทิสฺวา สํเวคํ อุปฺปาเทตฺวา กปฺปกสฺส คามวรํ ทตฺวา ปพฺพชิตุกาโม หุตฺวา ปุตฺตสฺส รชฺชํ ปฏิจฺฉาเทตฺวา เตน กสฺมา เทว ปพฺพชิสฺสสีติ วุตฺเต ปุตฺตสฺส การณํ อาจิกฺขนฺโต คาถมาห