ปฏิเปเสสิ ฯ โคโณติ เอโก ปาจีนยวมชฺฌคามวาสี ปุริโส วสฺเส ปติเต กสึ กริสฺสามีติ คามนฺตรโต โคเณ กีณิตฺวา อาเนตฺวา เคเห วสาเปตฺวา ปุน ทิวเส โคจรตฺถาย ติณภูมึ เนตฺวา โคณปิฏฺเฐ นิสินฺโน กิลนฺตรูโป โอตริตฺวา รุกฺขมูเล นิสินฺโน นิทฺทํ โอกฺกมิ ฯ ตสฺมึ ขเณ เอโก โจโร อาคนฺตฺวา โคเณ คเหตฺวา ปลายิ ฯ โส ปพุชฺฌิตฺวา โคเณ อปสฺสนฺโต อิโต จิโต จ โอโลเกตฺวา โจรํ ทิสฺวา เวเคน ปกฺขนฺทิตฺวา กุหึ เม โคเณ เนสีติ อาห ฯ กึ วเทสิ มม โคเณ อตฺตโน อิจฺฉิตฏฺฐานํ เนมีติ ฯ เตสํ วิวาทํ สุตฺวา มหาชโน สนฺนิปติ ฯ ปณฺฑิโต เตสํ สาลาทฺวาเรน คจฺฉนฺตานํ สทฺทํ สุตฺวา อุโภปิ ปกฺโกสาเปตฺวา เตสํ กิริยํ ทิสฺวาว อยํ โจโร อยํ โคณสามิโกติ ชานาติ ฯ ชานนฺโต ปน กสฺมา วิวทตฺถาติ ปุจฺฉิ ฯ โคณสามิโก อาห สามิ อิเม โคเณ อสุกคามโต อสุกสฺส นาม หตฺถโต กีณิตฺวา อาเนตฺวา เคเห วสาเปตฺวา ปาโตว ติณภูมึ เนมิ ตตฺถ เม ปมาทํ ทิสฺวา อยํ ปุริโส โคเณ คเหตฺวา ปลายิ สฺวาหํ อิโต จิโต จ โอโลเกนฺโต อิมํ ทิสฺวา อนุพนฺธิตฺวา คณฺหึ อสุกคามวาสิโน มยา เอเตสํ กีณิตฺวา คหิตภาวํ ชานนฺตีติ ฯ อถ โจโร อิเม โคณา มเมว ฆรชาติกา อยํ มุสา ภณตีติ อาห ฯ อถ เน ปณฺฑิโต อหํ โว อฏฺฏํ ธมฺเมน วินิจฺฉินิสฺสามิ กึ ตุมฺเห วินิจฺฉเย ฐสฺสถาติ ปุจฺฉิตฺวา อาม ฐสฺสามาติ วุตฺเต มหาชนสฺส หทยํ คณฺหิตุํ วฏฺฏตีติ ปฐมํ โจรํ ปุจฺฉิ ตยา อิเม โคณา กึ ขาทาปิตา กึ ปายิตาติ ฯ ปณฺฑิต ยาคุํ ปาเยตฺวา ติลปิฏฺฐญฺจ กุมฺมาเส จ ขาทาปิตาติ ฯ ตโต โคณสามิกํ ปุจฺฉิ ฯ โส อาห กุโต เม ทุคฺคตสฺส ยาคุอาทีนิ ลทฺธานิ ติณเมว ขาทาปิตาติ ฯ ปณฺฑิโต เตสํ กถํ สุตฺวา อตฺตโน ปุริสํ ปาตึ คาหาเปตฺวา ปิยงฺคุปตฺตานิ อาหราเปตฺวา อุทุกฺขเล โกฏฺฏาเปตฺวา อุทเกน มทฺทาเปตฺวา โคเณ ปาเยสิ ฯ โคณา ติณเมว ฉฑฺฑยึสุ ฯ ปณฺฑิโต ปสฺสถิทนฺติ มหาชนสฺส ทสฺเสตฺวา โจรํ ปุจฺฉิ โจโรสิ น โจโรสีติ ฯ สามิ โจโรมฺหีติ อาห ฯ เตนหิ อิโต ปฏฺฐาย มา เอวรูปมกาสีติ โอวทติ ฯ โพธิสตฺตสฺส ปุริสา ปน ตํ หตฺถปาเทหิ โปเถตฺวา ทุพฺพลมกํสุ ฯ อถ นํ ปณฺฑิโต โอวทิ ปสฺสสิ ตาต ทิฏฺฐธมฺเมเยว ตาว เต อิทํ ทุกฺขํ สมฺปราเย ปน นิรยาทีสุ มหาทุกฺขํ อนุภวิสฺสสิ อิโต ปฏฺฐาย ปชเหตํ กมฺมนฺติ ปญฺจ สีลานิ ตสฺส อทาสิ ฯ อมจฺโจ ตํ ปวุตฺตึ ยถาภูตํ รญฺโญ อาโรจาเปสิ ฯ ราชา กึ เสนก อาเนม ปณฺฑิตนฺติ เสนกํ ปุจฺฉิตฺวา มหาราช โคณอฏฺฏํ นาม เยน เกนจิ วินิจฺฉิตํ เอตฺตเกน ปณฺฑิโต นาม น โหติ อาคเมถ ตาว เทวาติ วุตฺเต มชฺฌตฺโต หุตฺวา ปุน ตเถว สาสนํ เปเสสิ ฯ เอวํ สพฺพวิธาเน เวทิตพฺพํ ฯ อิโต ปรํ ปน อุทานมตฺตเมว วิภชิตฺวา ทสฺสิสฺสามิ ฯ คณฺฐีติ เอกา ปน ทุคฺคติตฺถี นานาวณฺเณหิ สุตฺเตหิ คณฺฐิกํ พนฺธิตฺวา กตสุตฺตคณฺฐิกปิลนฺธนํ คีวโต โมเจตฺวา สาฏกสฺส อุปริ ฐเปตฺวา นหายิตุํ ปณฺฑิเตน การิตํ โปกฺขรณึ โอตริ ฯ อปรา ตรุณิตฺถี ตํ ทิสฺวา โลภํ อุปฺปาเทตฺวา ตํ อุกฺขิปิตฺวา อมฺม อติวิย โสภนํ อิทํ เต กิตฺตเกน กตํ อหํปิ อตฺตโน สิปฺปานุรูเปน เอวรูปํ กริสฺสามีติ คีวายํ ปิลนฺธิตฺวา ปมาณํ ตาวสฺส อุปธาเรมีติ วตฺวา ตาย อุชุจิตฺตตาย อุปธาเรหีติ วุตฺเต คีวายํ ปิลนฺธิตฺวา ปกฺกามิ ฯ อิตราปิ ตํ ทิสฺวา โปกฺขรณิโต สีฆํ อุตฺตริตฺวา สาฏกํ นิวาเสตฺวา อุปธาวิตฺวา กุหึ เม ปิลนฺธนํ คเหตฺวา ปลายิสฺสสีติ สาฏกํ คณฺหิ ฯ อิตรา ปน นาหํ ตว สนฺตกํ คณฺหามิ มม คีวายเมว ปิลนฺธนนฺติ อาห ฯ มหาชโน ตํ สุตฺวา สนฺนิปติ ฯ ปณฺฑิโตปิ ทารเกหิ สทฺธึ กีฬนฺโต ตาสํ กลหํ กตฺวา สาลาทฺวาเรน คจฺฉนฺตีนํ สทฺทํ สุตฺวา กึ สทฺโท เอโสติ ปุจฺฉิตฺวา อุภินฺนํ กลหการณํ สุตฺวา ตา ปกฺโกสาเปตฺวา อากาเรเนว อยํ โจรี อยํ น โจรีติ ญตฺวาปิ ตมตฺถํ ปุจฺฉิตฺวา มม วินิจฺฉเย ฐสฺสถาติ วตฺวา อาม ฐสฺสามาติ วุตฺเต ปฐมํ โจรึ ปุจฺฉิ ตวํ อิมํ ปิลนฺธนํ กตรคนฺเธน วิลิมฺปสีติ ฯ อหํ นิจฺจํ สพฺพสาหาริเกน วิลิมฺปามีติ ฯ สพฺพสาหาริโก นาม สพฺพคนฺเธหิ โยเชตฺวา กตคนฺโธ ฯ ตโต อิตรํ ปุจฺฉิ ฯ สา อาห กุโต มยฺหํ ทุคฺคตาย สพฺพสาหาริโก อตฺถิ อหํ นิจฺจํ ปิยงฺคุปุปฺผคนฺเธเนว วิลิมฺปามีติ ฯ ปณฺฑิโต ตาสํ วจนํ ปุริสํ คาหาเปตฺวา อุทกปาตึ อาหราเปตฺวา ตํ ปิลนฺธนํ ตตฺถ ปกฺขิปิตฺวา คนฺธิกํ ปกฺโกสาเปตฺวา เอตํ อุปสึฆิตฺวา อสุกคนฺธภาวํ นาม ชานาหีติ อาห ฯ โส ตํ อุปสึฆนฺโต ปิยงฺคุปุปฺผคนธภาวํ ญตฺวา อิมํ เอกนิปาเต คาถมาห