ตสฺสตฺโถ ยทิ ตวํ ราช เสฏฺฐ สพฺพฏฺฐาเนสุ เสยฺโย ปุตฺเตน ปิตาติ เอวํ มญฺญสิ ตว อสฺสตรโตปิ อยํ คทฺรโภ เสฏฺโฐ โหตุ กึ การณา อสฺสตรสฺส หิ คทฺรโภ ปิตาติ ฯ เอวญฺจ ปน วตฺวา อาห มหาราช สเจ ปุตฺเตหิ ปิตาว เสยฺโย มม ปิตรํ คณฺหถ สเจ ปิติโต ปุตฺโตว เสยฺโย มํ คณฺหถ ตุมฺหากํ อตฺถายาติ ฯ ราชา ตํ สุตฺวา โสมนสฺสปฺปตฺโต อโหสิ ฯ สพฺพา ราชปริสา สุกถิโต ปณฺฑิเตน ปญฺโหติ อุนฺนทนฺตา สาธุการสหสฺสานิ อทํสุ ฯ องฺคุลิโปฐา เจว เจลุกฺเขปสหสฺสานิ จ ปวตฺตึสุ ฯ จตฺตาโร ปณฺฑิตา ทุมฺมุขา ปชฺฌายนฺตาว อเหสุํ ฯ นนุ มาตาปิตูนํ คุณํ ชานนฺโต โพธิสตฺเตน สทิโส นาม นตฺถิ อถ โส กสฺมา เอวมกาสีติ ฯ น โส ปิตุ อวมานตฺถาย รญฺญา ปน อสฺสตรํ วา เม เปเสนฺตุ เสฏฺฐตรํ วาติ สาสนํ ปหิตํ ตสฺมา ตสฺส จ ปญฺหสฺส อาวีภาวกรณตฺถํ อตฺตโน จ ปณฺฑิตภาวสฺส ปกาสนตฺถํ จตุนฺนญฺจ ปณฺฑิตานํ นิปฺปภากรณตฺถํ เอวมกาสีติ ฯ

คทฺรภปญฺโห นิฏฺฐิโต ฯ

ราชา ตุสิตฺวา คนฺโธทกปูริตํ สุวณฺณภิงฺคารํ อาทาย ปาจีนยวมชฺฌคามํ ราชโภเคน ภุญฺชาหีติ เสฏฺฐิสฺส หตฺเถ อุทกํ ปาเตตฺวา เสสเสฏฺฐิโน เอตสฺเสว อุปฏฺฐากา เอว โหนฺตูติ วตฺวา โพธิสตฺตสฺส มาตุยา สพฺพาลงฺกาเร เปเสตฺวา คทฺรภปญฺเห ปสนฺโน โพธิสตฺตํ อตฺตโน ปิยปุตฺตํ กตฺวา คณฺหิตุํ เสฏฺฐึ อโวจ โภ คหปติ มโหสถปณฺฑิตํ มม ปุตฺตํ กตฺวา เทหีติ ฯ เทฺว อติตรุโณ อยํ อชฺชาปิสฺส มุเข ขีรคนฺโธ วายติ มหลฺลกกาเล ตุมฺหากํ สนฺติเก ภวิสฺตีติ ฯ ราชา อาห คหปติ ตวํ อิโต ปฏฺฐาย เอตสฺมึ นิราลโย โหหิ อยํ อชฺชตคฺเค มม ปุตฺโต อหํ มม ปุตฺตํ โปเสตุํ สกฺขิสฺสามิ คจฺฉ ตวนฺติ ตํ อุยฺโยเชสิ ฯ โส ราชานํ วนฺทิตฺวา ปณฺฑิตํ อาลิงฺคิตฺวา อุเร นิปชฺชาเปตฺวา สีเส จุมพิตฺวา โอวาทมสฺส อทาสิ ตาต หทย ตาต นยน วร ตาต มโหสถ ปณฺฑิต มา มํ อนาถํ กโรหิ อิโต ปฏฺฐาย อปฺปมาเทน อมฺหากํ ราชานํ อุปฏฺฐาหีติ ฯ โส ปิตรํ วนฺฑิตฺวา ตาต มา จินฺตยิตฺถาติ ตํ อุยฺโยเชสิ ฯ ราชา ปณฺฑิตํ ปุจฺฉิ กึ ตาต อนฺโต ภฏิโก ภวิสฺสสิ อุทาหุ พหิ ภฏิโกติ ฯ โส อตฺถิ เม มหาปริวาโร พหิ ภฏิเกน มยา ภวิตุํ วฏฺฏตีติ จินฺเตตฺวา พหิ ภฏิโก ภวิสฺสามิ เทวาติ อาห ฯ อถสฺส ราชา อนุรูปํ เคหํ ทาเปตฺวา ทารกสหสฺสํ อาทึ กตฺวา สพฺพํ ปริพฺพยํ ทาเปตฺวา สพฺพูปโภเค ทาเปสิ ฯ โส ตโต ปฏฺฐาย ราชานํ อุปฏฺฐหิ ฯ ราชาปิ ตํ วีมํสิตุกาโมว อโหสิ ฯ ตทา ปน นครสฺส ทกฺขิณทฺวารโต อวิทูเร โปกฺขรณีตีเร เอกสฺมึ ตาลรุกฺเข กากกุลาวเก มณิรตนํ อโหสิ ฯ ตสฺส ฉายา โปกฺขรณิยํ ปญฺญายติ ฯ โปกฺขรณิยํ มณิ อตฺถีติ รญฺโญ อาโรเจสุํ ฯ ราชา เสนกํ อามนฺเตตฺวา เสนก โปกฺขรณิยํ กิร มณิรตนํ ปญฺญายติ กถํ ตํ คณฺหาเปสฺสามาติ ปุจฺฉิตฺวา อุทกํ นีหราเปตฺวา คณฺหิตุํ วฏฺฏตีติ วุตฺเต เตนหิ เอวํ กโรหีติ ตสฺเสว ภารมกาสิ ฯ โส พหู มนุสฺเส สนฺนิปาเตตฺวา โปกฺขรณิยา อุทกญฺจ กทฺทมญฺจ นีหราเปตฺวา ภูมึ ภินฺทิตฺวาปิ มณึ นาทฺทส ฯ ปุน ปุณฺณาย โปกฺขรณิยา มณิฉายา ปญฺญายติ ฯ โส ปุนปิ ตเถว กตฺวา ตํ เนว อทฺทส ฯ ตโต ราชา ปณฺฑิตํ อามนฺเตตฺวา ตาต ปโกฺขรณิยํ เอโก มณิ ปญฺญายติ เสนโก อุทกญฺจ กทฺทมญฺจ นีหราเปตฺวา ภูมึ ภินฺทิตฺวาปิ ตํ มณึ นาทฺทส ปุณฺณาย โปกฺขรณิยา ปุน มณิฉายา ปญฺญายติ ตาต สกฺขิสฺสสิ ตํ มณึ คณฺหาเปตุนฺติ อาห ฯ โสปิ เนตํ มหาราช ครุ เอถ ตํ ทสฺสิสฺสามีติ อาห ฯ ตํ สุตฺวา ราชา ตุสิตฺวา ปสฺสิสฺสามิ อชฺช ปณฺฑิตสฺส ปญฺญาพลนฺติ มหาชนปริวุโต โปกฺขรณีตีรํ คโต ฯ มหาสตฺโต ตีเร ฐตฺวา มณิรตนํ โอโลเกนฺโต นายํ มณิ โปกฺขรณิยํ ตาลรุกฺเข มณินา ภวิตพฺพนฺติ ญตฺวา นตฺถิ เทว โปกฺขรณิยํ มณีติ วตฺวา นนุ ตาต อุทเก ปญฺญายตีติ วุตฺเต อุทกปาตึ อาหราเปตฺวา อุทเกน ปูเรตฺวา ปสฺสถ เทว นายํ มณิ โปกฺขรณิยํเยว ปญฺญายติ อุทกปาติยํปิ ปญฺญายตีติ วตฺวา ปณฺฑิต กตฺถ ปน มณินา ภวิตพฺพนฺติ วุตฺเต เทว โปกฺขรณิยํปิ ปาติยํปิ ฉายาว ปญฺญายติ น มณิ โปกฺขรณิยํ เทว มณิ ปน ตาลรุกฺเข กากกุลาวเก อตฺถิ ปุริสํ อาโรเปตฺวา อาหราเปหีติ อาห ฯ ราชา ปุริสํ อาโรเปตฺวา มณึ อาหราเปสิ ฯ ปณฺฑิโต ตํ คเหตฺวา รญฺโญ หตฺเถ ฐเปสิ ฯ มหาชโน ปณฺฑิตสฺส สาธุการํ ทตฺวา เสนกํ ปริภาเสนฺโต มณิรตนํ ตาลรุกฺเขเยว อตฺถิ พาลเสนโก พหุปุริเสหิ โปกฺขรณิยํเยว ภินฺทาเปสิ ฯ ปณฺฑิเตน นาม มโหสถสทิเสน น ภวิตพฺพนฺติ มหาสตฺตสฺส ถุตึ อกาสิ ฯ ราชาปิ ปณฺฑิตสฺส ตุฏฺโฐ อตฺตโน คีวายํ ปิลนฺธนํ มุตฺตาหารํ ทตฺวา ทารกสหสฺสานํปิ มุตฺตาวลิโย ทาเปสิ ฯ โพธิสตฺตสฺส สปริวารสฺส อิมินา นีหาเรน อุปฏฺฐานํ อนุชานาติ ฯ