เอกูนวีสติปญฺโห นิฏฺฐิโต ฯ

ปุเนกทิวสํ ราชา ปณฺฑิเตน สทฺธึ อุยฺยานํ อคมาสิ ฯ ตทา เอโก กกณฺฏโก โตรณคฺเค วสติ ฯ โส ราชานํ อาคจฺฉนฺตํ ทิสฺวา โตรณคฺคา โอตริตฺวา ภูมิยํ นิปชฺชิ ฯ ราชา ตสฺส กิริยํ โอโลเกตฺวา ปณฺฑิต อยํ กกณฺฏโก กึ กโรตีติ ปุจฺฉิ ฯ มหาราช อยํ กกณฺฏโก ตุมฺเห เสวตีติ อาห ฯ สเจ เอวํ อมฺหากํ เสวนา มา นิปฺผลา โหตุ โภคมสฺส ทาเปหีติ ฯ เทว ตสฺส โภเคน กิจฺจํ นตฺถิ ขาทนียมตฺตเมว อลนฺติ ฯ กึ ปนายํ ขาทตีติ ปุจฺฉิ ฯ มํสํ เทวาติ ฯ กิตฺตกํ ลทฺธุํ วฏฺฏตีติ ฯ กากณิกมตฺตคฺฆนิกํ เทวาติ ฯ ราชา เอกํ ปุริสํ อาณาเปสิ ราชทาโย นาม กากณิกมตฺโต น วฏฺฏติ อิมสฺส นิวทฺธํ อฑฺฒมาสกคฺฆนิกํ มํสํ อาหริตฺวา เทหีติ ฯ โส สาธูติ สมฺปฏิจฺฉิตฺวา ตโต ปฏฺฐาย ตถา อกาสิ ฯ โส เอกทิวสํ อุโปสเถ มาฆาเต มํสํ อลภิตฺวา ตเมว อฑฺฒมาสกํ วิชฺฌิตฺวา สุตฺตเกน อาวุณิตฺวา ตสฺส คีวายํ ปิลนฺธนํ พนฺธิ ฯ อถสฺส ตํ นิสฺสาย มาโน อุปฺปชฺชิ ฯ ตํ ทิวสเมว ราชา อุยฺยานํ อคมาสิ ฯ โส ราชานํ อาคจฺฉนฺตํ ทิสฺวา ธนํ นิสฺสาย อุปฺปนฺนมานวเสน เวเทห ตวํ นุโข มหทฺธโน อหํ นุโข มหทฺธโนติ รญฺญา สทฺธึ อตฺตานํ สมํ กโรนฺโต อโนตฺริตฺวา โตรณคฺเคเยว สีสํ จาเลนฺโตว นิปชฺชิ ฯ ราชา ตสฺส กิริยํ โอโลเกตฺวา ปณฺฑิต เอส ปุพฺเพ วิย อชฺช น โอตรติ กึ นุ โข การณนฺติ ปุจฺฉนฺโต อิมํ คาถมาห

นายํ ปุเร อุนฺนมติ โตรณคฺเค กกณฺฏโก

มโหสถ วิชานาหิ เกน ถทฺโธ กกณฺฏโกติ ฯ