ตตฺถ น อุนฺนมตีติ ยถา อชฺช อโนตริตฺวา โตรณคฺเคเยว สีสํ จาเลนฺโต อุนฺนมติ เอวํ ปุเร น อุนฺนมติ ฯ เกน ถทฺโธติ เกน การเณน ถทฺธภาวํ อาปนฺโนติ ฯ

อถ ปณฺฑิโต อุโปสเถ มาฆาเต มํสํ อลภนฺเตน ราชปุริเสน คีวาย พนฺธํ อฑฺฒมาสกํ นิสฺสาย ตสฺส มาเนน อุปฺปนฺเนน ภวิตพฺพนฺติ ญตฺวา อิมํ คาถมาห

อลทฺธปุพฺพํ ลทฺธาน อฑฺฒมาสกํ กกณฺฏโก

อติมญฺญติ ราชานํ เวเทหํ มิถิลคฺคหนฺติ ฯ