ราชา ตสฺส วจเนน ตํ การณํ พุชฺฌิ ฯ หทยมํสํ นิพฺพายิ ฯ โส ตสฺส ตุสิตฺวา ปณฺฑิต สเจ ตวํ นาภวิสฺส อชฺชาหํ พาลเสนกสฺส กถาย เอวรูปํ อิตฺถีรตนํ ปริหีโน อภวิสฺสํ ตํ นิสฺสาย มยา เอสา ลทฺธาติ ตสฺส สตสหสฺเสน ปูชํ กาเรสิ ฯ เทวีปิ ราชานํ วนฺทิตฺวา เทว ปณฺฑิตํ นิสฺสาย มยา ชีวิตํ ลทฺธํ อิมาหํ กนิฏฺฐภาติกฏฺฐาเน ฐเปตุํ วรํ วเรมิ เทหีติ อาห ฯ สาธุ เทวิ คณฺหาหิ ทมฺมิ เต วรนฺติ ฯ เทว อหํ อชฺชโต ปฏฺฐาย มม กนิฏฺฐํ วินา น กิญฺจิ มธุรรสํ ขาทิสฺสามิ อิโต ปฏฺฐาย เวลาย วา อเวลาย วา ทฺวารํ วิวราเปตฺวา อิมสฺส มธุรรสํ เปเสตุํ ลภามิ อิมํ วรํ คณฺหามีติ ฯ สาธุ ภทฺเท อิมํ วรํ คณฺหาหีติ ฯ

สิริกาฬกณฺณิปญฺโห นิฏฺฐิโต ฯ

อปรสฺมึ ทิวเส ราชา กตปาตราโส ปาสาทสฺส ทีฆนฺตเร จงฺกมนฺโต วาตปานนฺตเรน โอโลเกนฺโต เอกํ เอฬกญฺจ สุนขญฺจ มิตฺตสนฺถวํ กโรนฺเต อทฺทส ฯ โส กิร เอฬโก หตฺถิสาลาย หตฺถิสฺส ปุรโต ขิตฺตํ อนามฏฺฐํ ติณํ ขาทิ ฯ อถ นํ หตฺถิโคปกา โปเถตฺวา นีหรึสุ ฯ วิรวิตฺวา ปลายมานํ ตํ เอโก เวเคน คนฺตฺวา อนุพนฺธิตฺวา ปิฏฺฐิยํ ทณฺเฑน ติริยํ ปหริ ฯ โส ปิฏฺฐึ โอนาเมตฺวา เวทนาปฺปตฺโต คนฺตฺวา ราชเคเห มหาภิตฺตึ นิสฺสาย ปีฐิกาย นิปชฺชิ ฯ ตํ ทิวสเมว รญฺโญ มหานเส อฏฺฐิจมฺมาทีนิ ขาทิตฺวา วฑฺฒิตสุนโข ภตฺตการเก ภตฺตํ สมฺปาเทตฺวา พหิ คนฺตฺวา สรีรเสทํ นิพฺพาเปนฺเต นิกฺขมนฺเต มจฺฉมํสคนฺธํ ฆายิตฺวา ตณฺหํ อธิวาเสตุํ อสกฺโกนฺโต มหานสํ ปวิสิตฺวา ภาชนปิธานํ ปาเตตฺวา มํสํ ขาทิ ฯ ภตฺตการโกปิ ภาชนสทฺทํ สุตฺวา ภาชนสทฺเทน ปวิสิตฺวา ตํ ทิสฺวา ทฺวารํ ปิทหิตฺวา ตํ เลฑฺฑุทณฺฑาทีหิ โปเถสิ ฯ โส ขาทิตมํสํ มุเขเนว ฉฑฺเฑตฺวา วิรวิตฺวา นิกฺขมิ ฯ ภตฺตการโกปิ ตสฺส นิกฺขนฺตภาวํ ญตฺวา อนุพนฺธิตฺวา ปิฏฺฐิยํ ติริยํ ทณฺเฑน ปหริ ฯ ปิฏฺฐึ โอนาเมตฺวา เอกํ ปาทํ อุกฺขิปิตฺวา เอฬกสฺส นิปนฺนฏฺฐานเมว ปาวิสิ ฯ อถ นํ เอฬโก สมฺม กึ ปิฏฺฐึ โอนาเมตฺวา เอกํ ปาทํ อุกฺขิปิตฺวา อาคจฺฉสิ กินฺเต วาโต วิชฺฌตีติ ปุจฺฉิ ฯ สุนโขปิ ตวํ ปิฏฺฐึ โอนาเมตฺวา นิปนฺโนสิ กินฺเต วาโต วิชฺฌตีติ ปุจฺฉิ ฯ โส อตฺตโน ปวุตฺตึ สุนขสฺส อาโรเจสิ ฯ สุนโขปิ ตเถว อาโรเจสิ ฯ อถ นํ เอฬโก ปุจฺฉิ กึ ปุน ตวํ ภตฺตเคหํ คนฺตุํ สกฺขิสฺสสีติ ฯ น สกฺขิสฺสามิ สมฺม คตสฺส เม ชีวิตํ นตฺถิ ตวํ ปน หตฺถิสาลํ คนฺตุํ สกฺขิสฺสสีติ ฯ อหํปิ ตตฺถ คนฺตุํ น สกฺขิสฺสามิ คตสฺส เม ชีวิตํ นตฺถีติ ฯ เต กถํ นุ โข มยํ อิทานิ ชีวิสฺสามาติ อุปายํ จินฺเตสุํ ฯ อถ นํ เอฬโก อาห สเจ มยํ สมคฺควาสํ วสิตุํ สกฺโกม อตฺเถโก อุปาโยติ ฯ เตนหิ สมฺม กเถหีติ ฯ สมฺม ตวํ อิโต ปฏฺฐาย หตฺถิสาลํ ยาหิ นายํ ติณขาทโกติ ตยิ หตฺถิโคปกา อาสงฺกํ น กริสฺสนฺติ ตวํ มม ติณํ อาหเรยฺยาสิ อหมฺปิ ภตฺตเคหํ ปวิสิสฺสามิ นายํ มํสขาทโกติ ภตฺตการโก มยิ อาสงฺกํ น กริสฺสติ อหํ เต มํสํ อาหริสฺสามีติ ฯ เต อตฺเถโส อุปาโยติ อุโภปิ สมฺปฏิจฺฉึสุ สุนโขปิ หตฺถิสาลํ คนฺตวา ติณกลาปํ ฑํสิตฺวา อาหริตฺวา มหาภิตฺติปิฏฺฐิกายํ ฐเปสิ ฯ อิตโรปิ ภตฺตเคหํ คนฺตฺวา มํสกฺขณฺฑํ มุขปูรํ ฑํสิตฺวา อาเนตฺวา ตตฺเถว ฐเปสิ ฯ สุนโข มํสํ ขาทิ ฯ เอฬโก ติณํ ขาทิ ฯ เตปิ อิมินา อุปาเยเนว สมคฺคา สมฺโมทมานา มหาภิตฺติปิฏฺฐิกายํ วสนฺติ ฯ ราชา เตสํ มิตฺตสนฺถวํ ทิสฺวา จินฺเตสิ อทิฏฺฐปุพฺพํ วต เม การณํ อชฺช ทิฏฺฐํ ปุพฺเพ อิเม ปจฺจามิตฺตา หุตฺวา อิทานิ สมคฺควาสํ วสนฺติ อิทํ การณํ คเหตฺวา ปญฺหํ กตฺวา ปณฺฑิเต ปุจฺฉิสฺสามิ โย อิมํ ปญฺหํ น ชานาติ ตํ รฏฺฐา ปพฺพาเชสฺสามิ ชานนฺตสฺส ปน เอวรูโป ปณฺฑิโต นตฺถีติ สกฺการํ กริสฺสามิ อชฺช ตาว อเวลา เสฺว เต อุปฏฺฐานํ อาคตกาเล ปุจฺฉิสฺสามีติ ฯ โส ปุน ทิวเส ปณฺฑิเตสุ อุปฏฐานํ อาคนฺตฺวา ปุจฺฉิสฺสามีติ ฯ โส ปุน ทิวเส ปณฺฑิเตสุ อุปฏฐานํ อาคนฺตฺวา นิสินฺเนสุ ปญฺหํ ปุจฺฉนฺโต อิมํ คาถมาห